Vawiinah VC leh LC inthlan
Mizoram State Election Commission (SEC) chuan vawiin hian village council (VC) leh local council (LC) inthlan a buatsaih dawn a, zing dar 7 aṭanga tlai dar 5 thleng vote thlak hun hawn a ni ang.
Mizoram district pakuaa VC 558 inthlan turah hian, containment zone ni mekte tiamin, seat 2,454 a awm a, general seat 1,831 leh hmeichhe tana hauh seat 633 a ni a; Aizawl khawpuia local council 83-ah chuan seat 545 awmin, general seat 397 leh hmeichhe seat 148 a awm. VC inthlan turah voter 4,54,180 leh LC-ah voter 2,18,758 an awm a ni.
Local council-a seat awm 545 chu mi 1,565-in an chuh a, VC-a seat 2,545 awm chu mi 6,926-in an chuh dawn. LC leh VC inthlan turah hian MNF party-in seat an chuh tam ber a, VC-a seat awm 2,454 zinga 2,438 an chuh a, LC-a seat awm 545 zinga 540 an chuh.
VC leh LC inthlan turah hian hmeichhe tan member pathum leh panga awmnaah seat pakhat, member pasarih awmnaah seat pahnih leh member pakua awmnaah seat pathum hauh a ni. LC-ah chuan member pathum leh pakua awmna local council a awm lo.
Covid-19 laka mipui an him theihna atan khua/veng hrang hrangah SEC, MPF leh YMA ṭangkawp chuan ruahmanna an siam a, polling station huam chhungah mi 50 aia tam awm phal a ni dawn lo.
Khua/veng tam takah chuan kum zat azirin vote thlak hunbi siam a ni a, YMA hnuaia section anga vote thlak hun siam leh house number indawt dana vote thlak hun siam an awm bawk.
Vote thlâk turte'n hmai tuam vek tur a ni a, hmai tuam lote chu vote thlak theih a ni dawn lo. Inthlana vote tlate chu vote thlak zawhah chhiar nghal tur a ni a, result chu veng chhunga information mike hmanga puan tura ruahman a ni.
Political party-te seat chuh dan
VILLAGE COUNCIL
Party General Reserved Total
Bharatiya Janata Party 232 66 298
Indian National Congress 1,562 513 2,075
National People's Party 2 0 2
Mizo National Front 1,616 622 2,438
Mizoram People's Conference 2 0 2
Hmar People Convention 5 1 6
Zoram People's Movement 918 279 1,197
Independent 704 204 908
TOTAL 5,241 1,685 6,926
LOCAL COUNCIL
Party General Reserved Total
Indian National Congress 387 146 533
Mizo National Front 393 147 540
Mizoram People's Conference 5 0 5
Zoram People's Movement 319 113 432
Independent 44 11 55
Total 1,148 417 1,565