Bru-in 1995 e-roll chauh hman an duh lo Chhungkaw 500 tal awm khawm an phût
Mizoram Bru Displaced Peoples Forum (MBDPF) chuan, Tripura refugee camp-a Bru awmte Mizorama hruai kîr an nih dawn chuan chhungkaw 500 aia tlem loa khaw khata awm leh, Mizoram Bru an nih leh nih loh enfiahna atana Mizoram electoral roll 1995 chauh hman loh an phût.
MBDPF-te hian Union Home minister Rajnath Singh-a'n Kanchanpur, Tripura a tlawh ṭumin an thil phût hrang hrang an lo thlen a ni.
Mizorama tlawmngai pawl hrang hrang leh political party-te'n Mizorama Bru-te hruai kir turte chu kum 1995 electoral roll-a hming chuang leh an thlahte chauh hruai kir ni se, an ti. MBDF chuan relief camp-a an awm chhunga Tripura sorkarin document chi hrang hrang a siamsakte chu ngaihnathiamna pek a, Mizorama hruai kîr ve an phût thung.
MBDPF duh dan chuan, Mizorama hruai kîr an nih dawn chuan chhungkaw 500 aia tlem lo awm theihna tur sorkar laipui, Mizoram sorkar, Tripura sorkar leh MBDPF aiawhte'n a huhoa an zawn hmuh phawt a, chumi hnua mi 500 hruai kîr a ni. Hruai kîr hna chu hlawhtling taka kalpui a nih chuan a tahtawla inhruai kîr chhunzawm zel an duh a ni.
An awmna hmun turah kawlphetha, tui in tur, sikul, hriselna lam hmunhma, anganwadi, inkal pawhna kawng, leh mamawh dangte ṭha tak a awm an phût.
MBDPF chuan, Mizoram sorkar chu Bru hruai kîr hna chawlhsan ṭhinah an puh a, "Bru hruai kîr hmasak ber chu November 3, 2010-ah ṭan a ni a, mahse Mizoram sorkarin Sakhan tlangdunga Mizo awmte hruai kîr phawt an phût avangin an chawlhsan leh a ni. Hei hi chhuanlam mai mai a ni," an ti.
MBDPF hruaitute chuan, Mizorama Bru hruai kir tawh chhungkaw 800 velin harsatna an tâwk nia sawiin, Bru lak let hmasak berte chu YMA, MZP leh MSU-te'n an lo endik a, hmeichhiate deusawh takin an lo ti a, ṭhenkhat chu an kut an thlak niin an tarlang.
Mizorama lak let tawhte chu hmun kilkhâwr tak tak, inbiakpawhna awm lohna hmuna dah an nia sawiin, an in sakte pawh Forest department-in an mansak niin an sawi a; Mizoram sorkar chu Bru pakhat pawh Mizorama an kîr leh duh loah puhin, "Bru-te chu Mizorama kîr duh loa puh lêt kan ni," an ti.