KHAWTHLIR
Thisen pe
Young Chakma Association, Tuichawng branch chuan February 18 khan an khaw community hall-ah blood donation camp an huaihawt a; Tuichawng leh a chhehvel khuaa mite'n Lunglei Civil Hospital tan thisen unit 100 an pe a, a petute hi mipa 80 leh hmeichhia 20 an ni.
DDK hun tisei
Doordarshan Kendra, Aizawl chuan vawiin aṭang hian an programme chu zan dar 9 thleng an tichhuak ṭhin tawh dawn. DDK Aizawl programme pawhsei hi zanin dar 7-ah chief minister Lal Thanhawla'n DDK studio-ah a hawng dawn a, live-a tihchhuah a ni ang.
RTI Act zirho
Nimin khan Sangau-III community hall-ah Right to Information Act inhrilhhriatna hun hman a ni a, information commissioner L Hrangnawna'n a hmanpui. L Hrangnawna chuan, mipuite chu a ṭha zawnga dílchhût tur leh an chanvote hre chiang tura an beng chhi reng turin a fuih.
Ph.D hmu thar
Rev. Vanlalringa (73) chuan Throne of Grace Theological Seminar & Ministries, IAC Hyderabad aṭangin doctor of philosophy a hmu thar a, a thesis chu 'The Bible review with depth study in the context of historical background' tih a ni.
Seminar buatsaih
Ministry of Commerce & Industry hnuaia Spices Board leh Mizoram sorkara Horticulture department ṭangkawp chuan, nimin khan Horticulture conference hall-ah District Level Seminar on Spices an buatsaih.
MBKHP khawmpui
Mizoram Baptist Kohhran Hmeichhe Pawl (MBKHP) Inkhawmpui Lian chu nizan khan Hnahthialah ṭan a ni a, Pathianni zanah a ṭiak ang. MBKHP inkhawmpui neihna atan hian HBSC Ground-ah pandal sak a ni a, inkhawmpui thupui chu 'I ram lo thleng rawh se' tih a ni.