Horticulture College din thuai turin ngen

Horticulture minister PC Lalthan­liana chuan, nimin khan New Delhi-ah Union Agriculture minister Radha Mohan Singh leh minister of state for Agriculture Dr Sanjeev Kumar Balyan te hnenah Mizoramah Horticulture College din thuai turin a ngen.

PC Lalthanliana hi nimina Union minister-te hoa Indian Council of Agricultural Research (ICAR) General Conference vawi 86-naah a tel a; minister of state Dr BD Chakma leh Horticulture deputy director Vanlalnuntluanga Renthlei-te pawh an tel a ni.

Meeting-ah hian Horticulture minister PC Lalthanliana chuan thu sawiin, UPA sorkar laia Mizoram tana Horticulture College dinna tur pawm tawh chu hmalakna a kal chak loh thu leh chak zawka kalpui a duh thu a sawi a, document pawimawhte a thehlut nghal a ni.

PC Lalthanliana chuan, Mizorama mipui tam takte eizawnna innghahna chu Horticulture a nih thu sawiin, "Mizorama Horticulture College tihpuitlin thuai hi Mizoram mamawh a ni," a ti.

Meeting zawhah MoS for Agri­culture Dr Sanjeev Kumar Balyan chuan state hla zual aṭanga kalte chu a kâwm a; Dr Sanjeev Kumar Balyan chuan Mizoramin Horticulture College a mamawh dan chu a hriatthiam thu leh a hmun tur chungchang pawh state sorkar remruatna anga kalpui theih mai tura a ngaih thu, PC Lalthanliana chu a hrilh.

Minister PC Lalthanliana leh Dr. BD Chakma te hian vawiinah Tribal Welfare secretary leh ICAR director general-te hmuh leh an tum a a ni.