Covid-19: Mizoram dinhmun

August 25, Thawh­lehni khan Mizoramah Covid-19 hripui vei mi 14 hmuh chhuah leh a ni a, harsatna nei (Covid-19 symptom lang) an awm rih lo. Mizorama hripui kai hmuh chhuah tawh zawng zawng chu mi 967 a ni. Hetih lai hian, nimin khan mi pakua chu dam taka chhuahtir an ni thung.

ZMC laboratory-a RT-PCR khawl hmanga mi 710-te swab sample endik zingah Covid-19 vei mi 10 hmuh chhuah a ni a, Rapid Antigen Test (RAT) hmanga mi 292 endik zingah mipa pali hmuh chhuah a ni bawk. Lunglei Civil Hospital (LCH) laboratory-a TrueNAT hmanga mi 24 endikte erawh hripui lakah an fihlîm.

Nimin khan hri­pui vei dam tawh mi pakua chhuahtir an ni a; chu'ngte chu - Berawtlanga CCC aṭang­in hripui vei enkawl zinga dam tawh mi pali - mipa leh hmeichhia pahnih ve ve, SRH-ZMC aṭangin mipa pahnih, Lengpui CCC aṭangin mipa pakhat, Serchhip DCHC leh Thenzawl CCC aṭangin BSF sipai pakhat ve ve an ni.

Mizorama hripui vei hmuh tawh mi 967 zinga 473 (48.91%) an chhuak tawh a, mi 494 (51.09%) an la chhuak lo. Thawhlehnia ZMC-a hripui vei hmuh chhuahte chu mipa pasarih leh hmeichhia pathum an ni a; Aizawl district mi panga (mipa pali, hmeichhia pakhat), Mamit district-a mi pathum (mipa pakhat, hmeichhia pahnih) leh, Serchhip district-a mi pahnihte niin, quarantine facility-a awm lai vek an nih thu sorkar thuchhuah­in a tarlang.

Aizawl district-a mite chu kum 24-46 inkar, Goa, Karnataka leh West Bengal aṭanga lo lutte an ni a, BSF sipai pakhat a tel. Mamit district-a mite chu kum 26 leh 27 mi, Assam leh West Bengal aṭanga lo lutte an ni a; Serchhip district mite chu mipa kum 24 leh 34 mi, Assam leh West Bengal aṭanga rawn lutte an ni. RAT hmanga swab sample endiknaah College Veng, Aizawla local task force (LTF) active member kum 42 mi leh, Kolasib district (Vairengte)-ah Assam lam mi driver/handyman pathum, kum 37, 44 leh 48 mite hmuh chhuah a ni bawk. Hetih lai hian, Thawh­lehni tlai dar 5 aṭanga nimin tlai dar 5 thlenga Vairengte checkgate-a mi 675-te swab sample, RAT hmanga endikah Covid-19 vei hmuh a ni lo.