Tuikual chunga in sang ṭhiahna tur thupek Gauhati High Court-in a nemnghet

Gauhati High Court, Aizawl Bench chuan Aizawl District Disaster Management Authority (ADDMA)-in Dawrpui Veng tlâk lam, Tuikual Veng chunga B Darchhinga building ṭhiat tura thu a pek chu a nemnghet.

ADDMA hian an chairman Dr Franklin Laltinkhuma, Aizawl DC hmingin B Darchhinga chu a in ṭhiat turin thu an pe a; chu chu B Darchhinga chuan High Court-ah a khing a, mahse High Court chuan Darchhinga petition chu nimin khan a hnâwl a ni.

Tuikual North Local Council chairman leh YMA secretary-te hnen aṭanga complaint an dawn angin, ADDMA Joint Verification Team chuan May 24, 2013-ah Temple-Vaivakawn kawngpui chung lung tohlâwt chunga B Darchhinga building an enfiah a; Verification Team-ah hian geologist H Lalbiakkima bakah, PWD, Aizawl Municipal Council, Dawrpui Local Council leh Tuikual North Local Council aiawhte an tel.

ADDMA Joint Verification Team chuan B Darchhinga in chu a chhunga chêngte bakah, a bul vela chengte leh a hnuai kawngpuia kalte tan a him loah an ngai a; an hmuh dan chu ADDMA-ah an thlen a ni.

ADDMA chuan June 3, 2013-ah Verification Team report chu a ngaihtuah a, chutah chuan in neitu B Darchhinga pawh a tel. B Darchhinga'n enfiah nawn leh tura a ngen angin, Geology & Mineral Resources department-a geologist-te'n June 5, 2013-ah an enfiah leh a, anni pawhin Joint Verification hmasa report chu an pawmpui a ni.

Mipui tana him loa hriat a nih avang hian ADDMA chairman (Aizawl DC) chuan June 27, 2013-ah hriattir chhuahin, B Darchhinga chu order a hmuh aṭanga thla khat chhunga a in ṭhiat tur leh, thla li chhunga ṭhiat zo turin a hriattir a; in luahtute pawh thla khat chhunga insawn chhuak tura tih an ni.

ADDMA Chairman order chu B Darchhinga chuan Gauhati High Court-ah a khing a, High Court pawhin ADDMA thupek chu a 'stay' nghal a ni.

Hun eng emaw chen ngaihtuah a nih hnuah Gauhati High Court chuan nimin khan order ti­chhuak­in, ADDMA Chairman order tihchhuahah dik lo leh dan bawhchhiatna a hmuh lo tih tarlang a, B Darchhinga petition chu a titawp ta a ni.

ADDMA chairman Dr Franklin Laltinkhuma chuan Vanglaini palai zawhna chhangin, High Court order chhuah hnuah B Darchhinga chu in luah tur dang thla khat chhunga zawng tura hriattir a nih thu a sawi.