Inner Line Forest Reserve area Mizoram ngei a nih thu an puang

Joint Action Committee (JAC) for Inner Line Forest Reserve (ILFR) hruaitute chuan, Assam leh Mizoram inrinna báwr vela Inner Line Forest Reserve chu Mizoram chhung ngei niin an sawi a, chungte chu Mizoram sorkarin awp ve tawh se an duh thu an puang.

JAC for ILFR hruaitute hian nimin khan Aizawl Press Club-ah thuthar thehdarhtute an kâwm a; an thupuangtu Robert Hrangdawl­a chuan, IRFR chu Mizoram chhung ngei a nih avangin dan angin hma an la zel dawn tih a sawi a, "Sorkarin Assam sorkar aṭanga a lak let theih nan sorkar tha tihchak kan tum a ni," a ti.

JAC hruaitute sawi danin, kum 1875-ah British (India) sorkar leh Suakpuilala ten sa-ui an tan a, ramri lung 46 an phun a; chumi hnu March 13, 1877-ah Assam Revenue gazette, Declaration hmangin reserve forest pasarih puan a ni a, chuta a pasarihna chu Inner Line Forest Reserve niin, ramri mumal taka siam a ni. ILFR chu kum 1897-ah Form-46 hmangin Lushai territory a nih thu chhuah a ni a, tun thlengin thaichhiat a la ni lo niin an sawi.

ILFR chu Assam ram chhung­a ngaihna Mizote zingah a awm nia sawiin, JAC hruaitute chuan, "SIlchar DFO kut aṭangin Mizoram sorkarin la let tawh se, Mizoram sorkarin enkawl ve tawh se, tih hi kan duh dan leh kan tum, ram leh hnam humhalh­naa tihmâkmawhah kan ngai," an ti a; an ṭul anga ṭan lak zel an tum thu an sawi a ni.

Zawhna chhangin, JAC hruai­tute chuan, a ṭul dan angin Court-ah an kal dawn a, Court-a kal thei turin an inbuatsaih mek zel niin an sawi. ILFR zawng zawng chu Mizoram ta ni ta se, hnam dang (vai) tam tak, Mizo mipui aia tam mah Mizoram mi an ni dawna ngaihna awm chungchanga zawhna chhangin, vai tam tak Mizoram mi anga rìn luh chu Mizo mipui nâwlpuiin an duh loa an hriat thu an sawi a, "An duh theih nan hma kan la dawn a ni," an ti.