NSS NE Youth Festival a ṭiak ta

NSS North East Youth Festival, 2015, February 16-a ṭan chu February 18, Nilaini tlai khan Mizoram University multipurpose hall-ah khâr an ni a, kharna inkhawm chu parliamentary secretary (Sports & Youth Services) Hmingdailova Khiangte-in a hmanpui.

Hmingdailova Khiangte chuan hmarchhaka state hrang hrangte chu kawng engkimah inlungrual a pawi­mawh tih sawiin, "Hmarchhak mite hi India khua leh tui dik tak ni mah ila, duhthlanna vang ni loin pianphung leh hmelhmangte a danglam deuh a, chu chuan hnam dangte lakah enhranna a siam ve thei niin hmun ṭhenkhatah a lang," a ti a; nungchang leh incheinate uluk loh chuan India ram hmun tam takah harsatna hmarchhak mite'n an tawh awlsam thu a sawi.

NSS hmalakna fakin Hmingdailova chuan, "NSS hian vantlang tana hna ṭha tak tak thawk tura ṭhalaite zirtirna a pek bakah, eizawnna kawng kawhhmuhna kawngah ṭhalaite tan chak zawka hma lak thar a ngai a ni," a ti.

February 16-18, 2015 chhunga neih NSS North East Youth Festival huaihawtna senso hi Ministry of Youth Affairs & Sports-in a tum a, Mizoram sorkar leh NSS Regional Centre, Guwahati ṭangkawpin MZU campus, Tanhrilah an thleng a ni. Festival-ah hian hmarchhak state pariat aṭangin NSS volunteer 261 leh NSS programme officer 24 an tel.