MPCY-in inpuh tawn chhan dik an ti

MPC party ṭhalaite chuan thu­chhuah siamin, Mizoram mipuite’n harsatna leh phurrit namênlo kawng hrang hranga an tawh chhanah Congress leh MNF-te an inpuh tawn nia sawiin, an inpuh tawn chu dik an tih thu an tarlang.

MPCY chuan, MNF leh Congress chu kum 30 vel an insorkar chhâwk chhunga ram veina tak tak nei loah an puh a, "Ram an vei tak tak loh avangin tun hun hi thleng kan ni a, Zoramin phurrit a tawh mekte hi total bandh emaw, zu zawrhna emaw vanga fihlîm theih a ni lo," an ti.

Congress leh MNF-ten Bairabi Hydel Project an chhunzawm duh loh vangin kawlphethaah mipuite'n harsatna nasa an tâwk mek nia sawiin, MPCY chuan, Lammual leh hmun ṭhenkhatahte phûl lem phahin, infiamna lamah hma sawn viau mah ila, kawlphetha hnianghnâra hman tur a awm loh chhung chuan ram hmasawnna chhenfâkawm a awm thei tak tak lo tih an sawi.