Kolasib Hospital-a thisen pek chhuahna Document dik lo siam chawpah an puh
Steve Lalhruaichhuaka, Kolasib Electric Veng chuan a nupui Babie Zothanpari, February 3, 2015-a Kolasib District Hospital-a nau chunga a thih chungchangah, blood bank aṭanga thisen pek chhuahna document siam chawpah damdawi-in thuneitute a puh a; RSBY-ah an inziak lut chungin, thisen lak chhuahnaah pawisa an pek ngei thu a sawi.
Steve Lalhruaichhuaka hian nimin khan Aizawl Press Club-ah thuthar thehdarhtute a kâwm a, a nau leh a ṭhiante'n an ṭawiawm.
Zawhna chhangin Lalhruaichhuaka chuan, thisen a lak chhuahna document thlalak social media-a thehdarh chu thu dik lo a nih thu a sawi a, "Document kha siam chawp a ni a, dâwt a ni," a ti.
Document-ah hian thisen pek chhuah hun chu February 3, zan dar 8 tiin ziah a ni a; Mahse Lalhruaichhuaka chuan blood bank-a a kal hmasak hun chu zan dar 8:30 vel a ni a, zan dar 9 pelh hnuah thisen an pe chhuak niin a sawi.
Lalhruaichhuaka chuan, RSBY-ah an inziak lut ve tih sawiin, RSBY-a an inziah luh thu chu nurse-te hnenah pawh an sawi niin a sawi a; chutih laiin, thisen an lakin pawisa an pek ngei thu a sawi bawk. Hetih lai hian, February 17, 2015-ah Health minister Lal Thanzara chuan thisen sawngbawlna man chu RSBY-a inziak lutte leh BPL chhungkuaa mite tan pek a ngaih loh thu a sawi a ni.
Zawhna dang chhangin, Lalhruaichhuaka chuan, a nupui thih chhan chu 100%-in damdawi-ina thawkte dâwngdah vang (medical negligence)-ah an ngaih thu te, an chungah political pressure an a awm ngei a, mahse chu chuan a tihbuai loh thu a sawi a; damdawi-in thuneitute'n ngaihdam an dil a nih chuan an ngaidam ang a, ngaihdam an dil loh erawh chuan Court sang zawk thlenga hmalak an tum thu a sawi bawk.