Khunghran zinga Covid-19 vei lo tih finfiahte vote thlak dan ngaihtuah

State Election Commission (SEC) chuan nizan khan DC-te hnenah lehkha thawnin, Health Secretary hnen aṭanga lehkha an dawn bawhzuiin, quarantine centre-a awm mek Covid-19 vei lo tih finfiah tawhte chu vote thlak pangngai zawh huna vote an thlak dan tur ruahman turin a hriattir.

SEC-te'n rawtna thlen tura an ngen angin Covid-19 Medical Operational Team chuan quarantine centre-a awm zinga RT-PCR test-a negative tawhte vote thlak dan tura rawtna an neihte Thawhlehni khan an thlen a; quarantine centre-a awmte chu postal ballot hmanga an awmna hmuna vote thlaktir turin an rawt.

Rawtna hi a him tawk loa an ngaih avangin SEC chuan quarantine centre-a awm negative tawhte pawh an zavaia vote thlak tir loh an rel zet a, a hnuah Health Secretary aṭanga lehkha an dawn avangin SEC chuan DC-te hriattirna hi an thawn leh a ni. Hetihlai hian khung hran lai zinga RT-PCR test-a negative tih la fianfiah loh zawngte vote thlak dan tur ruahmanna SEC hian a siam lo.