Chaltlang Lily Veng LTF-in Health Minister-ah vuivaina thlen
Chaltlang Lily Veng Local Task Force (LTF) chuan nimin khan Health & Family Welfare (HFW) Minister hnenah lehkha thawnin, Covid-19 hripui léng vanga Chaltlang Lily Vengin harsatna leh manganna an tawh mek laiin, Mizoram hmun hrang hrangah thinhrik leh endawng an hlawh phah tih sawiin, pawi an tih thu an tarlang.
Health Minister hnena an lehkha thawnah hian Lily Veng LTF chuan, Covid-19 vei mi 18 an neih avanga Chaltlang Lily Vengin harsatna an tawh dan an tarlang a, "A bik takin natna dang vanga rîkrum (emergency) thila damdawi-in ṭhenkhatah (quarantine ni lo) enkawlna dawng thei loa hnâwl kan ni zel mai hi kan rilru a na hle. India ram danpui Article 21-in dikna leh chanvo min pek bawhchhiatna lian tak niin kan hria," an ti.
Hripui lêngin khua leh veng tam tak a luhchilh mek tih tarlangin, "Chaltlang Lily Veng mipui chunga thinhrikna leh endawngna thleng ang hi tu chungah mah leh khawi veng/khua chungah mah thleng ve lo se kan duh em em a ni," an ti a; an veng mite'n endawng an hlawh chungchangah sorkarin hma a lâk zui ngei an beisei thu Health Minister an hrilh.
Chaltlang Lily Veng LTF chuan, an vengah Covid-19 vei mi 18 an awm tawh chungchangah, sorkara thawktu leh mawhphurhna hrang hrang chelhtute'n ṭhahnemngai tak leh theihtawp chhuaha hma an lak avangin an lawm tak zet tih an tarlang a, "Hripui dona kawngah Chaltlang Lily Veng chuan sorkar a ṭawiawm zel ang," an ti bawk.