College Veng LTF member Hripui kài ṭanna âwm hre lo

August 25, Thawhlehnia swab sample endiknaa Covid-19 hripui vei hmuh chhuah zinga mi Lallawmkima Sailo (42), College Veng chuan, mi dang aṭanga hripui a kài ṭanna tur âwm a hriat loh thu a sawi. College Vengah hian inkhàrkhip mek a ni a, local task force hruaitute pawh fimkhur thilah in lama an inkhung vek rih avangin Thawhlehni zan khan an aiawh tur an inruat.

Vanglaini palai zawhna chhangin Lallawmkima Sailo chuan, Covid-19 a kai ṭanna àwm leh a kai theihna chhan tur àwm a hriat loh thu a sawi a, "Tunah chuan harsatna ka nei lo a, ka ṭha khawp mai," a ti.

Covid Care Centre (CCC), Berawtlangah a awm mek thu leh, Covid-19 a kai tih chu inpuanzar ṭha a ti a, an vengah pawh miin hria se ṭhaa a hriat thu a sawi.

Lallawmkima Sailo hi College Veng LTF zinga mi a ni a, hei vang hian LTF hruaitu ni mekte chu Thawhlehni zan aṭang khan an in lamah an inkhung nghal vek a ni. Hruaitu ni mekte an inkhung a ṭul avang hian LTF kaihruai a, a ṭul anga hma la turin hruaitu thar - chairman, vice chairman leh secretary-te an inruat nghal a ni. 

College Veng LTF hian sorkar thuneitute beráwn chung leh hriatpuinain Thawhlehni zan dar 9:45 aṭang khan tiam chin awm loin an vengah total lockdown an puang a, "Hei hi mipui himna tur leh contact tracing-ah chak zawka hma kan lâk theih nana tih a ni. Mipui thlàwpna leh hriatthiamna kan ngen," an ti.

College Veng LTF secretary (inkhung mek zawk) K Rosiama chuan, an vengah hripui vei pakhat a awm avangin a kài chhàwn theih àwmte an chhui nghal thu sawiin, "Swab sample test ngai tur hi mi eng emaw zat an awm dawnin a lang," a ti a; Covid-19 vei nupui erawh chu endik tawh a ni a, hripui a kai ve rih loh thu a sawi.

K Rosiama chuan, Melriat leh Ramhlun South-a Covid-19 veite kaihhnawihah an vengah inkhung hrang an awm a, chu'ng mite chu Thawhlehni khan an swab sample endik a nih thu sawiin, "Medical team lama mite'n an phal angin LTF member zinga mi 10 chuang kan in test tír ve a, inrinhlelh vanga test tír kan ni lo. Mahse, pakhatin hripui hi a lo kai ta hlauh a ni," a ti.