Lawngtlai-ah total bandh nei dawn

Central Young Lai Association (CYLA) chuan Mizoram sorkara ultimatum an thehluh chu sorkarin nimin thlenga a chhân loh avangin, an lo ruahman lâwk tawh angin February 24, 2015 zing dar 5 aṭangin Lai Autonomous District Council (LADC) chhungah tiam chin awm loa total bandh huaihawt an tum.

February 13, 2015-a CYLA hruaitute ṭhu­khawm chuan, Lawng­tlaia Power & Electricity sub-division chu division-a hlankai an phût a, World Bank sum hmanga kawng laih turah Samang tlangdung paltlang an duh lo bawk. Heng thil pahnihah hian sorkarah ultimatum an thehlut a, sorkar aṭanga chhanna an hmuh loh chuan February 24 aṭanga total bandh huaihawt an rel a ni.

CYLA ultimatum thehluh chungchangah hian sorkar aṭanga chhân­­na an hmuh loh avangin nimina CYLA CEC ṭhukhawm chu total bandh neih an rel ta a ni.

CYLA hian Lunglei leh Lawngtlai inkar kawng siamṭhat an phût bawk a, hemi chungchang erawh hi chu ultimatum-ah tarlan a ni lo. CYLA hruaitute chuan, bandh neih chhungin mipuite chu ram leh hnam tana hmalakna a ni tih hriaa thlawp vek turin an ngen a ni.