KHAWTHLIR

Lamp Lighting
Apollo School of Nursing chuan Ningani khan Tourist Lodge, Chaltlangah 10th. Capping and Lamp Lighting Ceremony an hmang a, Mizoram Women Commission chairperson Vanlalawmpuii Chawngthu-in a hmanpui. Apollo School or Nursing hi Sacred Heart Society hnuaiah kum 2005-a din niin, GNM zirna a ni a, Mizoram Nursing Council leh Indian Nursing Council pawmpui an ni.

Khâmah tla hlum
February 18, 2015 zan dar 7 vel khan K Tintlunga s/o K Tialawia (L), Vawmbûk, Lawngtlai district chu khâmah a tla hlum. Thu dawn danin, K Tintlunga hi a ṭhiante pathum nen an ramvâk a, an riahna bûk bul khâmah a tla hlum a, February 19 chawhma dar 10 vekah a ruang lâk chhuah a ni.

Thinking Day
Champhai Vengthlang Middle School-ah Ningani khan Scouts and Guides buatsaihin Thinking Day hman a ni. Thinking Day hi khawvel pumah February 22-a hman ṭhin a ni a, kuminah chuan Pathianni a nih avangin nimin khan hun hman a ni.

Rifles shooting
Serchhip District Rifle Association buatsaihin nimin khan10th Assam Rifles shooting range-ah Mizoram pum huap silai inkahsiakna 'Laibuaia Memorial All Mizoram 50 mtrs .22 Rifle (open sight) Shooting Competition' ṭan a ni a, Serchhip district MJA president Kapliana Pachuau in a hawng.

BSI meeting
Bible Society of India, Aizawl Auxiliary chuan nimin khan Bible House-ah auxiliary meeting an nei a, thil pawimawh hrang hrang an rel. BSI hian vawiin hian Bawngkawn Presbyterian kohhran biak-inah 'Leaders Conclave' an nei ang.

Tanpui tan
Rainfed Area Development Programme (RADP) hmangin Hmunhmelṭha leh Khawzawlahte leilet neitute ṭanpui hna thawh ṭan a ni. He hma lakna thar hnuaia hnathawh dan tur hi tun hnai khan Zuchhip Venga YMA information centre-ah lo neitu thlan chhuahte zirtir an ni.