National Games 2015-a medal 4 latu Taekwondo player-te lo hmuah an ni

Kerala-a neih zawh tak, 35th. National Games 2015-a Mizoram tana medal pali latu taekwondo player-te chuan nimin khan Aizawla an rawn thleng a; Ramhlun Indoor Stadium-ah anmahni lo hmuahna leh lawmna hun hman a ni.

National Games-a Mizoram aiawha taekwondo-a telte hi player pariat leh anmahni kaihruaitu pahnih an ni a, an zinga mi pakhatin silver medal a dawng a, pathumin bronze medal an dawng. Anni hi Kerala aṭangin rel leh maxi-cab hmangin an rawn haw a ni.

Anmahni lawmna inkhawm chu Mizoram Amaeteur Taek­wondo Association (MATA) president Dr Rualkhuma Colney-in a kaihruai a, Mizoram Olympic Association secretary general leh MSSC secretary C Laltlanthanga'n thu a sawi bakah, team leader VL Sawma leh team coach PC Lalbiakmawiate'n report an pe.

C Laltlanthanga chuan, National Games-ah Mizoramin taekwondo-ah silver medal pathum leh bronze 10 an la tawh tih sawiin, boxing (medal 15) dawta Mizoram tana medal la tam ber an nih thu a sawi a; infiammite chu ram leh hnam thinlung pûa bei zel tura chahin, "Player-te'n theihtawp chhuah zel se la, sorkar pawhin a theihna zawng zawngin hma a la zel dawn a ni," a ti.

Taekwondo-a medal latute chu - F Lalrempuii, Khawzawl (68 kgs. - Silver); Kaplianzawni, Ramthar Veng, Aizawl (46 kgs. - Bronze); F Lalmuansangi, Khawzawl (57 kgs. - Bronze) leh, K Lalngaihawmi, Thenzawl (62 kgs. - Bronze) te an ni. F Lalrempuii leh F Lalmuansangi te hi unau an ni.