Kawng laih zauh sa tihzîm leh a ngai
Serkhan-Bagha kawngpui zauh hna thawh mek chu zangnadawmna chungchangah harsatna a awm leh a; PWD-in an duh tâwk aia zau kawng laih a nih avangin, kawng laih sa teh fel vek tawh chu tihzîm leh tura tih a ni.
Kolasib aṭanga thu dawn danin, Serkhan-Bagha road kawng hi teh a nih tirhin mimal ram lak tur chu metres 30-a chawk rualin teh fel a ni a, chumi hnuah zangnadawmna pek tur a sàn lutuk avang leh kawngpui atana mamawh chin aia zau nia PWD lamin an hriat avangin kawngpui tur chin chu tehṭhat a ni leh dawn a ni.
Ram teh ṭhat a ngaih avang hian February 23, 2015 khian Kolasib-a assistant settlement officer Zoramsiama Hmar leh PWD hotute'n Serkhan-Bagha road-a kawng teh ṭhat dan tur an enfiah dawn a, khawtlang hruaitute nen kawng teh ṭhat dan tur an sawiho nghal ang. Kolasib DC leh district collector Jitender Yadav pawhin Serkhan-Bagha road kawng laih mek hi harsatna a awm avangin a hmunah enfiah a tum.
Serkhan-Bagha road zauh hna hi hun eng emaw chen chawlhsan a nih hnuah kum 2013 khan tharthawh lehin, ram lak tur teh ṭhat a ni a, ram laksakte chu zangnadawmna pe nghal loin kum 2014-ah vek laih chhunzawm a ni. Kawng hi kms. 115.2 laih tur niin, tun dinhmunah kms. 80 chuang an lai tawh a, sum ruahman zat chu Rs. 14,60,30,000 a ni.
He kawng laih zauh chungchangah hian buaina neuh neuh a awm tawh ṭhin a, PWD engineer-in-chief chu sorkarin a suspend phah tawh a ni.
Ram neitute chuan, zangnadawmna sorkarin an peihfel thei lo chu ṭha lo an tih thu an sawi a; a rang thei ang bera chinfelsak turin sorkar an ngen.
Sakawrhmuituai Group YMA pawhin an huam chhunga kawngpui zauh leh chumi vanga harsatna awm mek chu an ngaihtuah tawh ṭhin a, V/C inthlan lo awm tur boycott-te pawh an rel tawh a ni. Mahse, Kolasib Sub-Hqrs YMA-in an hmalakna lo ngaichang tura an ngen avangin Sub-hqrs YMA hmalakna chu an ngaichang ta rih a ni.