Lirthei chesualah mi 2 an thi

February 11, Thawh­lehni zan dar 8:30 vel khan tipper MZ-02 A-3493 chuan Bilkhawthlir Kual­­mawiah kawng sira scooty-a chuangte a sû a, KC Lalramkima (26) s/o KC Laltlanthanga, Bilkhawthlir chu a hmunah a thi.

Bilkhawthlir aṭanga thu dawn danin, KC Lalramkima leh a ṭhianpa chu scooty-ah chuangin, kawng sirah mi dang nen an inbe lai chu tipper hian a sû a ni. Tipper chu a tlân tlang a, a bul hnaia awmte'n um zui nghalin, Bilkhawthlir Kawnvengah an nang­ching a; a khalhtu, hnam dang nia hriat erawh chu a tlanbo hman. Tipper hi Lalnghakmawii Pachuau, Lunglei Bazar Veng hminga ziah luh a ni.

Thawhlehni vek khan Bualpui-H leh Thingsai inkarah bike a tlan liam a, bike-a chuang Lalhuliana (20) s/o Lalramchhana, Bualpui-H chu a hmunah a thi a, bike-a chuang pakhat zawk Vanlalmuana s/o Thawngzaliana a hliam. Thu dawn danin, mi pahnihte hi Thingsaia kal tum an ni a, zanah pawh an haw loh avangin an chhungte'n an zawng a, nimin zing khan an chet­sualna hmunah an hmu ta a ni.