Covid-19 hri leng avangin VC/LC 29 an inthlang thei lo

State Election Com­mission (SEC) chuan Covid-19 leng avangin village council (VC) leh local council (LC) 29-te chu vawiina inthlang lo turin a ti. Inthlan lohna tur khua leh vengahte hian an inthlan theih hun tur hriat a la ni lo.

District magistrate-te'n Covid-19 vei hmuh chhuah vanga tlawh pawh phal loh (containment area) khua leh venga a puante leh an chhehvel khua/veng pakuaah SEC chuan VC/LC inthlan vawiina buatsaih loh turin August 25, Thawhlehni khan thutlukna a siam tawh a; nimin tlai khan Aizawla local council 18 leh Aizawl district-a village council pakhatte chu vawiina inthlang lo turin a ti leh bawk.

State Election Com­missioner Laima Chozah chuan, inthlang thei rih lote inthlan hun tur chu ngaihtuah ṭhat leh a nih tur thu Thawhlehni khan Vanglaini palai a lo hrilh tawh a ni. SEC-in nimina hriattirna a chhuaha inthlang rih lo tura tarlan zinga a tam zawk chuan an venga returning officer-te kaltlangin Covid-19 vanga an veng dinhmunin a zir rih loh avangin inthlan loh mai dilna/rawtna an thlen hlawm nia thu dawn a ni.

Hetih lai hian, Khatla LTF hruaitute chuan SEC-in inthlang rih lo tura an veng an tih ve chhan an hriat loh thu Vanglaini palai zawhna chhángin an sawi a, "Inthlan loh hi kan rawt lo a, dilna kan thlen lo a, inthlang lo tur zinga telh kan ni hian min barakhaih viau mai," an ti a; an vengah Covid-19 vei mek an nei rih lo a, contact tracing tih ngai an neih rih loh bawk thu a sawi.

Bungkawn LTF chair­man Vanlalsawma chuan, Melriata Covid-19 vei zinga miin kar hmasa khan an veng bazarah arsa a pek kual avang leh an veng mi bazara kal an ṭhathnem avangin chhungkaw 150 chuang an inkhungtir mek thu a sawi a, "Hei vang hian nimin khan kan RO hoin LTF leh MPF hruaitu te, political party aiawh te, candidate-te leh election official dangte kan ṭhukhawm a, inthlan rih loh mai kan rél a, SEC-ah kan thlen a ni," a ti.

College Veng LTF hruaitute pawhin, Covid-19 lêng mek vanga an din­hmunin a zir loh avangin inthlang theih an nih rih loh thu an sawi a; ziakin SEC-ah rawtna/dilna thlen lo mah se, an veng tana returning officer hnenah ṭawngkain an sawi a, RO-in SEC-ah a lo thlen nia an hriat thu a sawi bawk.

No.    Khua/Veng

August 25-a tihchiante

1.    Darlawn Chhimveng VC

2.    Darlawn Venghlun VC

3.    Darlawn Vengpui VC

4.    Hualngohmun VC

5.    Kelsih VC

6.    Melriat VC

7.    Sàwleng VC

8.    Chaltlang Lily Veng LC

9.    Ramhlun South LC

August 26-a tihchiante

10.    Bawngkawn LC

11.    Bawngkawn South LC

12.    Bungkawn LC

13.    Bungkawn Vengthar LC

14.    College Veng LC

15.    Dawrpui Vengthar LC

16.    Durtlang LC

17.    Durtlang North LC

18.    ITI Veng LC

19.    Khatla LC

20.    Maubawk LC

21.    Mission Veng LC

22.    Nursery Veng LC

23.    Ramhlun North LC

24.    Ramhlun Sports Complex LC

25.    Ramhlun Vengthar LC

26.    Republic Vengthlang LC

27.    Ṭhuampui LC

28.    Venghnuai LC

29.    Muallungthu VC