Tlawng lei dawh zawh a ni tawh

Sihhmui leh Lengpui inkar, Tlawng luia thir lei dawh chu lirthei zawh theiha dawh zawh a ni ni tawh mah se, lirthei zawh theiha hawn a la ni lo.

Thudawn danin, lei dawh zawh hna hi nimin khan zawh a ni a, mahse lirthei tlan luhna tur kawng an la siam dawn avangin lirthei zawh theih tura hawn a la ni dawn lo.

Lei dawh ṭhat hna hi Mechanical Division-in chhun zan zawmin an thawk a, lei dawh an zawh hnu hian an camp-ah Pathian hnena lawmthu sawina inkhawm an nei a ni.

Tarlan tawh angin Tlawng luia lei hi October 31, 2014 khan a chim a, PWD lamin an dawh ṭhat leh laiin kum December 8, 2014 khan a chim nawn leh a ni.

Hetihlai hian February 16 aṭanga PWD-in Rangvamual tawntirha leimin ṭhin thenfai hna an thawh chu chhunzawm zel a ni a, lei min thenfai hna zawh theih hun tur chu sawi theih a la ni lo.

PWD hotute sawi danin, a lei a thawl avang leh khi thuk tak, tla leh maithei tam tak a awm avangin chungte chu nawr thlak law law a ngai a, he hna hi ngawrh takin an thawk zui zel a ni.