KHAWTHLIR

Mizoram sorkar chuan vawiina local council leh village council inthlanna tur district pakua - Aizawl, Lunglei, Champhai, Kolasib, Serchhip, Mamit, Saitual, Hnahthial leh Khawzawlahte mipuite'n vote an thlak theihna turin sorkar chawlh a puang.

NSS state office huaihawtin nimin khan NSS volunteer-te'n Aizawl Civil Hospital blood bank-ah thisen unit 21 an pe a, petute mipa 18 leh hmeichhia pathum an ni. Govt. Aizawl College 

aṭangin mi pakua, Aizawl West College aṭangin mi panga leh Public Higher Seconda­ry School aṭangin mi pasarihte'n an pe a ni.

State Election Commission chuan nimin khan Mara Autonomous District Council-a Siaha North-I bialah by-election a buatsaih a, he thu ziah lai hian vote tla zat hriat a la ni lo. By-election hi MDC ni lai a thih

vanga buatsaih a ni a, BJP, INC leh MNF-te'n candidate an nei a ni.

August 25, Thawhlehni tlai dar 5 thleng khan Covid-19 dona atana Chief Minister Relief Fund (CMRF)-a sum chhùn luh chu nuai 2,076 a tling tawh. Sum lut aṭangin cheng nuai 1,926 hman a ni tawh a, la hman loh cheng nuai 149 a awm a ni.

CHILDLINE chuan, Covid-19 vei naupangte inawm tleina atan indoor games hmanrua leh thawnthu bu chi hrang hrang nimin khan SRH-ZMC hnenah a pe a, nursing superintendent Lalrinchhani hnenah an hlân. CHILDLINE hi Ministry of Women and Child Development hnuaia project a ni a, Aizawlah chuan kum 2011 aṭanga March 2020 thleng khan naupang 1,700 chuang an ṭanpui tawh a ni.

State Referral Hospital-ah nimin khan Covid-19 vei mi pakua leh vei rinhlelh mi pahnih dah luh an ni a, Covid Care Centre, Berawtlang aṭangin mi pahnih sawn luh a ni bawk. SRH-ZMC Bulletin tarlan danin, SRH-ah hian hripui vei vangin mi 66 enkawl mek an ni a, ICU leh SICU-ah pahnih ve ve awmin, a bak zawng chu Isolation ward-ah an awm. ICU-a awmte'n hma an sâwn a, SICU leh ward-a awmte'n harsatna lian an nei lo.