Zarkawt-in Chanmari nena An inremna vawn nun an duh

Zarkawt Coordination Committee (CC) chuan nimin khan thuchhuah siamin, Zarkawt leh Chanmari veng ramri chungchangah thu inchuh a awm avanga AMC-in ramri buai, disputed area-a a puan huam chhunga Mizo High School-ah State Election Commission (SEC)-in Chanmari Veng tana polling station a dah chu pawi an tih thu leh, inremna thu awm mek vawn nun zel an duh thu an tarlang.

Zarkawt CC chuan, Chanmari Veng lamin August 24, 2020-a thuchhuah an neihah thu dik sawi a ṭul thu tarlangin, "Unau anga kan en Chanmari Veng hming lam chhuah a ngai ta hi pawi kan tiin hrehawm kan ti hle a ni," an ti.

An tarlan danin, Zarkawt leh Chanmari chu VC khat an nih ṭhin avangin P/S, Chanmari leh M/S, Chanmari-te chu polling station a ni reng ṭhin a, mahse, sak ṭhat a ngaih avang leh pan a remchan zawk avangin MacDonald Hill huam chhunga Mizo H/S chu polling station atan hman zui a ni.

VC hranga an awm hnuah Zarkawt lam chu hmun remchang dang an neih avangin hmun dangah vote an thlak a, Chanmari lamin hmun remchang an neih mai loh avangin Mizo H/S chu polling station atan an hmang zui a ni. Election Commission dânah pawh, ‘Veng chhungah hmun remchang a awm loh chuan veng páwn hmun remchang an hmang thei ang,’ tih a awm.

Zarkawt CC chuan, "Polling station atan an hman zui tâk zel vang a ni mahna, Chanmari lam hian Zarkawt huam chhung, MacDonald Hill hmun ṭhenkhat (Mizo H/S & Mizo HSS area) chu an ta chei ta viau mai a, min chuhpui tâk avangin AMC chuan he lai area hi ramri buai, dispute area-ah a puang ta a ni," an ti.

AMC kaihhruainain veng pahnih khawtlang hruaitute chuan August 20, 2019-ah dispute area chhungah ramri chinfel a nih hma chu kut thlak loh ve ve ni se, tih a nih thu sawiin Zarkawt CC chuan, "Hei vang hian SEC chuan LC inthlan awm turah Chanmari Vengin vote an thlâkna tur hmun dang a dap a ni," an ti. Chanmari lamin an inremna chu zah zo lo a, Mizo H/S-a vote an thlak dawn loh chuan inthlan boycott an duh thu an puang chu pawi an tih thu an tarlang.

AMC-in dispute area-a a puan lai huam chhungah chinfel a nih hma chuan veng pahnihte'n kut thlak loh ve ve a, veng bil thila hman loh ve ve tura an inremna vawn nun zel an duh thu an sawi bawk.