Ramria kawng laih chawlhsan turin Kolasib DC-in Cachar DC a hriattir: SDO leh SDPO-in an awm chilh - Kolasib SP

Mizoram leh Assam inrîna báwra Assam-in kawng an zauh leh laih thar chungchangah Kolasib district bawrhsap Robert C Lalhmangaiha chuan telephone-in Cachar DC a bia a, kawng siam chawlhsan turin a hriattir. Kolasib SP David H Lalthangliana chuan, Assam-in kawng an laihna hmun chu Vairengte SDO (Civil) leh SDPO-te'n an awm chilh tih a tarlang.

Thu dawn danin, Vairengte Aitlang hmun hi Vairengte SDO (Civil) leh SDPO-te chuan an vil reng a, boruak duhawm lo thleng a awm lo. SDPO zirchianna aṭangin kawng chu ruahsur nasa vanga kawng awm saah harsatna an tawh avangin Assam police-te'n an lai thar a ni.

Ramri báwr velah Assam lamin kawng an lài tih hriat a nih veleh Kolasib DC hriattir nghal a ni a; Bawrhsap chuan August 30, Thawhlehni khan Cachar DC chu telephone-in a be nghal a, rang taka Assam police-in kawng an laih chu chawlhsantir tur leh status quo kengkawh turin a hriattir a ni.

Kolasib SP tarlan danin, Assam police-in kawng an laih leh zauh chu Aitlang hmuna Assam police camp panna a ni a, Phaisen khua aṭanga hmar lamah niin, July 2024 vel aṭangin an lai ṭan. Kawng laih leh zauh a nih chhan chu June thlaa ruahsur nasa vanga leminin kawng awm sa a hnawh vang nia tarlan a ni.

Assam police-te'n an camp panna atana kawng an laih chuan HK Ramhluna, VL Ruaii, J Samuela, Darthanzauva leh Lallawmsanga te hmunphiah huan te, J Samuela leh Lallawmsanga kuhva huan leh, Lallawmsanga balhla huan a paltlang a; huan neitute rilru a na hle nia sawi a ni.

Hetih lai hian, Mizo huan leh sangha dilte chu Assam police border post bul maia awm a nih avangin kum 2019 aṭang khan a neitute'n tun hma angin an vil thei tawh lo. Huan neitute chu ṭawngkam hmangin hma la chhunzawm tawh lo tura vau an ni ṭhina sawi a ni bawk.