VC inthlan atana DC-te ruahmanna

Champhai DC Maria CT Zuali chuan, an district-a vote neite chu mipui siam sorkarah chanvo pawimawh tak an nei tih hria a, an aiawh tur thlanga vote thlak turin a sáwm.

Champhai DC tarlan danin, mi tinin vote an thlâk theihna turin village task force (VTF)-te hriat leh zawm tur rua­hmanna Champhai DC office-in a duang a, ngai pawimawh ṭheuh turin VTF-te ngen an ni.

Kolasib DC Dr H Lal­thlangliana chuan, vote chhiar­naah mipui ṭhahnem tak an pun khawm ṭhin avang­in, mipui punkhawm tam a nih loh nan thupek chhuah a nih thu a tarlang.

Kolasib District Magistrate hian vote chhiar chhungin vote chhiarna counting hall aṭanga ft. 100 huam chhungah mi panga aia tam punkhawm a khap. Khapnain - polling party, candidate leh counting agent, VTF leh MPF duty, security duty leh chanchinbumite a huam lo thung.

Serchhip DC Kumar Abhisek thuchhuah chuan, vote thlak chu democracy-ah mipui chanvo pawimawh tak a nih thu tarlangin, "Mi tinin vote an thlâk theih nan district administration chuan MPF, NGO-te leh community based organization-te nen ṭanghoin VTF-te'n an zawm tur duan a ni," a ti.

    Vote thlâk tura Mizoram chhung hmun dang aṭanga haw duhte chu Covid-19 vei emaw, rinhlelh­awm emaw an nih loh chuan vote thlak phalsak tur a ni.

    Covid-19 veia rinhlelh ni lote khung hran tumna a awm palh theih avangin ṭul loah mi harsatna siam chiam theih a ni. Swab test hmanga endik leh finfiah a nih loh chuan ṭul loa inkhung a awm theih. Hetiang hi a thlen lohna turin VTF-te Covid-19 donaah fimkhur leh awmze nei taka hmalak tur a ni.

    Mizoram sorkarin Mizoram páwn aṭanga lo kalte chu enkawl dan mumal tak neiin a khung hrang vek a, Covid-19 hri vei an awm a hriat pawhin, a enkawlna bik hmun­ah mumal takin doctor-te’n an enkawl mek a, mipui mimir zingah an awm lo. Rinhlelhawm an awm a nih chuan CMO/nodal officer/incident commander hnenah thlen tur a ni.

    Covid-19 vanga lockdown puan a ngai a nih chuan district magistrate hnenah thlen hmasak tur a ni. A ṭul thlu ngang a nih chuan ‘The Mizoram Epidemic Diseases (Covid-19) Regulations, 2020’ hnuaia Regulation 11(1)-in thuneihna a pek angin DM-in containment area-ah a puang ang a, DM thutlukna chu thu tàwp a ni ang.