Mizoramin rél leh lawng kawngte aiin lirthei kawngpui ṭha a mamawh - MP Vena

Rajya Sabha MP K Vanlalvena chuan July 30, Thawhlehni tlai khan Parliament session-ah thu sawiin, Mizoram chu tlang ram a nih avangin inkalpawh nan rél leh lawng kawngte aiin lirthei kawngpui ṭha a mamawh ber thu a sawi.

K Vanlalvena hian Union budget sawihonaah thu sawiin, Mizoram chu hmarchhak state pariat zingah Assam dawta Ministry of Road Transport and Highways (MoRTH) hnuaia motor kawngpui siamna atana budget-a sum chang tam ber a ni chu lawmawm a tih thu a sawi a, "Mizoram chu tlang ram a nih avangin inkalpawh nan rel kawng leh lawng kawngte aiin motor kawngpui ṭha kan mamawh ber a ni," a ti.

Rajya Sabha MP sawi danin, MoRTH-in hmarchhak state-te tana national highway siamna tura sum a ruahman dan chu - Assam tan cheng vbc. 34,198, Mizoram tan vbc. 16,606, Manipur tan vbc. 13,779, Nagaland tan vbc. 10,643, Meghalaya tan vbc. 7,219, Arunachal Pradesh tan vbc. 5,327, Tripura tan vbc. 5,106 leh Sikkim tan vbc. 4,494 a ni a; a vaiin cheng vbc. 97,372 a ni.

K Vanlalvena chuan, MoRTH hnuaiah Mizoram hmun hrang hranga kawngpui thlûr hnih siam mek te, Aizawl by-pass road siamna tur te, Silchar-Aizawl kawng thlúr lia siamna tur te, Zorinpui-Lawngmasu NH atana puan thar te, Saitual-Tuivai leh Lunglei-Tlabung kawng atana budget-a cheng vbc. 16,606 dah a ni chu lawmawm a tih thu a sawi.

Tun hmaa darkar 14 chhung tlân ṭhinna Aizawl-Tuipang chu tunah chuan darkar 8 chhunga thlen theih a nih tawh thu leh darkar 10 chhung tlan ṭhinna Aizawl-Champhai pawh darkar 5 chhunga thlen theih a nih tawh thute a sawi bawk.