Ngaizawl kawng siamna sum hman dan Lokayukta-in chhui turin ACB a hriattir
Mizoram Lokayukta chuan Khawzawl-Ngaizawl kawng siamnaah sum tihchingpen a awm nia complaint an dawn chu an zir chian hnuah, chhui chiang turin tun hnai khan Anti Corruption Bureau (ACB) a hriattir.
ZPM party chuan PMGSY hnuaia Ngaizawl kawng siamnaah Assembly speaker hlui leh minister hlui Lalrinliana Sailo-in cheng nuai 100 a la niin an hria a, February 23, 2022 khan Lokayukta-ah complaint an thehlut.
Lokayukta chuan hriat duh an neihte PWD Engineer-in-Chief hnenah ziakin an zawt a, PWD executive engineer (PMGSY)-in a chhâng.
Lokayukta chuan PWD EE (PMGSY) hnenah hian hriat belh duh a neihte a zawt nawn leh a, chhanna a dawn hnuah preliminary enquiry tih turin thutlukna a siam ta a ni.
ACB-te chuan preliminary enquiry report chu May 7, 2024 khan Lokayukta-ah an thehlut a; hearing neih a nih hnuah tun hnai khan Lokayukta chuan ACB chhui zui turin a dah a ni.
ZPM party chuan Lalrinliana Sailo chu Ngaizawl NGO Coordination Committee leh VC thuchhuah te, Ngaizawl khawtlang hruaitute leh Coleen Lalsangpuii leh a manager-te inkawmhona audio voice record aṭangin PMGSY kawng siamah dan kalhin a inhnamhnawih ngei niin an hria a, chhui chiang tura ngenna Lokayukta-ah an thehlut a ni.
ZPM tarlan danin, Lalrinliana Sailo hian Ngaizawl kawng siamnaah cheng nuai 100 a laa sawi a ni. Khatih hun lai khan ZPM chuan Lalrinliana Sailo chu puh a nihnaah a fihlîm a ni tih fiah a nih hma chuan Assembly House kaihruai lo tura an duh thu an lo tarlang tawh bawk.
Khawzawl-Ngaizawl kawng siam chungchangah hian Ngaizawl All NGO & VC Coordination Committee chuan February 21, 2022 khan lungawi lohna an lo lantir tawh a; an khaw kawng siam hna thawktu sub-contractor chu inla chhuak tur leh, contractor atana ruat ngei emaw, a thawk zo thei ngei tur emawin a thawh an lo phût tawh a ni.