Uchuak taka mahni invulhah MNF-in ZPM sorkar an puh

MNF Media & Publicity hruaitute chuan nimin khan Aizawl Press Club-ah thuthar thehdarhtute an kâwm a; ZPM kaihhruai sorkar chu mahni leh party mite uchuak taka vulhah an puh.

MNF Media general secretary VL Krosshnehzova chuan, ZPM sorkarin thla sarih hmel a hmu tih sawiin, "He tih chhung hian inrenchem leh sorkar sawh nghet zawnga hmalak intiam chung siin chuti lam chu an hawi lo hle. Uchuak taka mahni leh party mite vulh chungin mipui min hrek mek. Sorkar, intiam ang lo hlira awm kan lo thlang tling hi Zoram mipui kan vanduai hle a ni," a ti.

VL Krosshnehzova chuan, sorkar tharin sum sen belhna tur a siam zawng zawngte an theih anga an chhûtin, kum nga chhungin cheng nuai 13,415.84 a nih thu a sawi a, "Chu chu kum khatah cheng nuai 2,683 chuang a tling," a ti a; ZPM party mite an vûr a, uchuak taka sum hmanna an tih pun laiin mipui an hrêk a, chhiah an tipung niin a sawi.

MNF Media tarlan danin, stamp duty chu 1% aṭangin 3%-ah tihpun a ni a, a punna chu 200% a ni. June 18, 2024-a Cabinet Meeting rorel angin October 2024 aṭangin ration card vár neitute'n buhfai kg. khat Rs 15-a an khul ṭhin chu Rs 30-in an khul tawh dawn a; petrol leh diesel-ah VAT 2% lak belh a ni.

MNF Media chuan, ZPM chu an inzawrh laia sum pûk ve lo tura intiam laiin, OMB aṭangin cheng vbc. 692 leh ways & means advances aṭangin vbc. 1,257.94 an pûk tawh niin an tarlang.

Krosshnehzova chuan, chief minister Lalduhoma kaihhruai sorkar chu mipui hrêk a, an phur tirit chunga mahni inhai vûr zawnga sorkar kalpui lo turin an chah tih a sawi a, "Vote an zawn laia thil ṭha tinreng an tiam ang ngei khan hma la a, sorkar kaihruai turin kan ngen," a ti.

MNF Media chuan, ṭawngkam thiamna hmangin mipui an chhimbu dâwi kual nia sawiin, "Thil ṭha tak tak sawi a, a tak taka tih awm si loa sorkar kalpui hi sim se kan duh," an ti a; mahni leh ZPM party mite uchuak taka vûr a, mipui phur tirit zawnga hmalak sim se an duh thu an sawi bawk.