END Minister-in Assam Excise hotute kâwm

Excise & Narcotics (END) minister Lalnghinglova Hmar chuan nimin khan Guwahati-ah Assam Excise minister Keshab Mahanta leh department mi pawimawhte ruihhlo do chungchang a sawipui.

Lalnghinglova Hmar leh Keshab Mahanta te hi nimina inkâwm tura ruahman a ni a, Mahanta hi ṭul bik thil vanga a remchan loh thut avangin phone kaltlanga inbiain, ruihhlo donaa hmalak dan tur an sawi dun. Lalnghinglova chuan, state pahnih harsatna tawh mek chungchangah uluk zawka inbiakna neih ṭha a tih thu a sawi a; Mahanta pawhin ṭha a tih thu a sawi.

Assam Excise Minister ruahman angin Lalnghinglova Hmar chu Assam sorkara Excise department secretary Indreswar Kalita leh commissioner Jitu Doley te nen an inkâwm a; ruihhlo donaa state pahnih thawh dun dan tur an sawiho a ni.

Lalnghinglova Hmar chuan, Myanmar aṭanga heroin (no. 4) rawn lutte chu Assam huam chhungah siam danglamin, 'Bagha Cap' tia vuahin Mizoramah a luh leh ṭhin thu te, damdawi hman sual chi an tawlh luh ṭhin dante leh Assam hmun ṭhenkhatah ruihhlo zuarte an zalen hle nia an hriat thute a sawi.

Assam Excise department hotute chuan, Mizoram Excise Minister thil sawite chu an bawhzui tur thu an sawi a ni.