KHAWTHLIR

Thisen pe

Aizawl College (GAC) NSS leh Red Ribbon Club chuan nimin khan an college-ah thisen pek rûnpui an huaihawt a, Civil Hospital, Aizawl tan thisen unit 166 an pe a, petute mipa 134 leh hmeichhia 32 an ni. Salvation Army (SAY) Central South Division chuan ZMC tan thisen unit 35 an pe a, petute 26 leh hmeichhia pakua an ni. Lawngtlai College NSS pawhin blood donation camp huaihawtin, Lawngtlai District Hospital tan mipa 28 leh hmeichhia palite'n thisen 32 an pe bawk.

AMC roll tlangzarh

Aizawl bawrhsap Lalhriatpuia chuan nimin khan DC conference hall-ah Aizawl Municipal Corporation Ward VI by-election-a hman tur final electoral roll a tlangzarh. AMC Ward VI hian Chanmari West, Edenthar Veng leh Hunthar Vengte a huam a; electoral roll-ah hian voter 9,901 awmin, mipa 4,601 leh hmeichhia 5,300 an ni. State Election Commission chuan by-election neih hun tur a la puang lo.

AIR din champha

Akashvani (All India Radio), Aizawl chuan nimin khan Tuikhuahtlanga an hmunah an kum 58 tlin an lawm a, Akashvani, Aizawl director DR Lalropuia'n Multipurpose Hall thar a hawng. Akashvani, Aizawlah hian thawktu mi 170 an awm mek a, a ngheta thawk mi 50 leh a nghet loa thawk mi 120 an ni.

Mistiri-te'n siamsak

Mizoram Mistiri Association (MMA) Mamit Branch chuan MMA Day (August 30) pualin nimin khan Joshua’s Children Home bungraw siamṭhat ngaite a thlâwnin an siamsak a, hmunhmate an thawm ṭhatsak bawk. Hnatlangah hian mistiri 20 vel an thawk chhuak a, nilengin an thawk a ni.

Society Assembly

Zawlnuam Fishery Cooperative Society chuan nimin khan Zawlnuam Vengpui YMA Hall-ah Assembly vawi 29-na an hmang a, Fisheries director Laltleipuii'n a hmanpui. Director hian Society hnenah ṭanpuina Rs 20,000 a pe a, sangha thar tam lehzual tura ṭan la turin sangha khawitute a chah.