Minister hoin industry rama thubuai chinfel theih dan tur ngaihtuah a ni

Commerce & Industries minister F Rodingliana hoin nimin khan a pisaah Industry rama thubuai, sorkar dan ding lai anga chinfel theih dan tur ngaihtuah a ni a; Commerce & Industries leh Land Revenue & Settlement department hotute leh sorkar ukilte an tel.

F Rodingliana chuan, Industry ram buai chingfel tura hmalak mek chu sorkar dan ding lai ang thlapa felfai taka hmalak a nih theih nan inrâwnkhawmna buatsaih a nih thu a sawi a; dan leh hrai chungchangah sorkar finchhuah zel turin sorkar ukilte a sáwm.

Sorkar ukil aiawhte chuan, "Department leh sorkar dan hremite thawhho ṭhat a pawimawh a, inrâwnkhawmna buatsaih nachang sorkarin a hria hi a lawmawm," an ti a; tihkhawtlai awm miah loa thubuai chinfel a nih theih nan theihtawp an chhuah tur thu an sawi.

Ṭhutkhawma tarlan a nih danin, Mizo District Council hun laia December 23, 1971-a Executive Order tihchhuahah Luangmual, Tanhril leh Sakawrtuichhun chu protected area-ah puan a ni a, sorkar hriatpuina lo chuan pass pek chhuah phal a ni lo.

March 18, 1972-a Executive Order tihchhuah pawhin Luangmual Village Council huam chhungah sorkar hriatpuina tel loa pass pek chhuahte titawp (cancel) vek tura tih a ni a; The Mizoram (Land Revenue) Rules, 2013 angin, industry ram atana sorkarin a lo lak (acquire) tawh chhungah VC pass a awm thei tawh lo bawk.