Ran khuahkhirh dan tur sawiho
Nimin khan Lawngtlai DC Dr Andrew H Vanlaldika hoin an district chhunga ran khuahkhirh kawnga hma lak dan tur hrang hrang official, VC association, Central YLA leh MJA aiawhte'n an sawiho.
Dr Andrew H Vanlaldika chuan ran khuahkhirh ṭhat a nih leh nih loh chu khawpui hmasawnna leh changkanna tehna pakhat a nih thu sawiin, "Buh leh bal leh huan thlai bakah, mihring leh ran vulh dangte him nante, khawtlang a lo fai a, a lo thianghlim theih nante ran khuahkhirh a ṭul hle. Sorkar aṭangin thu chhuah awm mah se, a hlawhtlinna tur chuan a bawhzui kawngah VC leh tlawmngai pawlte nena ṭan rual a, mipuite pawhin thu an awih a pawimawh a ni," a ti.
Lawngtlai DC hian August 18, 2020 khan an district chhunga ran khuahkhirhna thupek a lo chhuah tawh a, thlun loha khawlaia ui chhuah te, vawk leh ar vulh khung loha chhuah te, sial, bawng leh kelte enkawltu awm loa khawlai leh ramhnuaia tlattir leh ram dang leh district dang aṭanga ran lakluhte a khap a ni.