KHAWTHLIR

Thisen pe
Inrinni khan Luangmual branch KṬP chuan Aizawl Civil Hospital-ah thisen unit 46 an pe a, a petute mipa 36 leh hmeichhia 10 an ni. Khatla North branch KṬP-in KTP Day pualin Synod Hospital-ah thisen unit 40 an pe a, a petute mipa 32 leh hmeichhia pariat an ni. Lunglei Farm Veng branch KṬP member mipa 14 leh hmei­chhia pakhatte'n Lunglei Civil Hospital-ah thisen unit 15 an pe bawk.

Tawngtaiho
Lawngtlai Council Veng khawtlang chuan, Inrinni khan Lai Autonomous District Council-ah Pathian hnena lawmthu sawina leh sual thupha chawina hun an hmang a, an veng chhunga kohhran pawl hrang hrangte an tel.

Inkâp hlum
February 21 chawhnu khan C Lalnunzira (40) s/o Chhiarpuia, Hnahlan, Champhai district chu ramhnuaiah a ramvahpui Sangmuanthanga, Hnahlan-in chuan kâp palh a, C Lalnunzira hi Hnahlan damdawi-in thlenpui a nih hnuin a hliam tuar loin a thi.

Salvation Church
Salvation Church (Chhandamna Kohhran) chuan February 21-22 chhung khan Tourist Lodge, Chaltlang leh Ramhlun Indoor Stadium-ah National General Assembly vawi hnihna an hmang. Inrinni khan Tourist Lodge-ah Natio­nal Executive Committee chu an president Upa H Lianzela kaihhruaiin an ṭhu a, an koh­hran hnuaia pawl hrang hrangte inkaihhruaina dan duante an pawm.

Jubilee lawm
Aizawla Chanmari Presbyterian Kohhran chuan February 21, Inrinni khan an Kohhran kum 60-na, diamond jubilee an lawm ṭan a, vawiin hian a lawmna pui ber an nei ang. Kohhran jubilee lawm ṭannaah bialtu pastor Rev. K Lalhmuchhuaka'n exhibition a hawng a, chhunah a thlawna inentirna an buatsaih. Inrinni zan khan inkhawm bânah jubilee meichher an dêt a ni.

Education Sunday
Mizoram Baptist Kohhran chuan nimin khan Education Sunday an hmang a, thupui chu 'Zirna hmanga ênna' tih a ni. BCM hian kum tin February thlaa Pathianni hnuhnung berah Education Sunday an hmang
ṭhin a ni.