MSU-in sikul hun sawn hma dodal an tum

Mizo Students' Union (MSU) chuan, Mizoram sorkarin academic session thar 2015-16 aṭanga sikul kai hun darkar khata sawn hma tura a ti chu an duh loh thu an sawi nawn a; sorkarin a kalpui a nih chuan an dodal tur thu an puang.

MSU gen.hqrs. hruaitute chuan Inrinni khan Aizawl Press Club-ah thuthar thehdarhtute kâwmin, sikul kai hun sawn hma chungchanga an ngaihdan leh hmalak an tum dante an puang a; MSU president PC Lalrinhlua chuan, "Zir chianna leh inbuatsaihna mumal awm loa sikul kai hun a sawn hma hi pawi kan ti a... Mipui thamlohna leh hmuhsitna lian takah kan ngai," a ti.

MSU president chuan, tuna sikul kai hun hman mek chu Mizo hnam kalphung leh khawsak dan nen a inmil tawka an ngaih thu a sawi a, sikul kai hun sawn hma chu Mizoram mipui 85%-in an duh lo niin a sawi bawk.

MSU president chuan, sikul kai hun sawn hma chu sorkarin a titlang a nih chuan na taka dodal an tum thu a sawi a, "He thutlukna hi sût leh turin kan ngen tak meuh a ni," a ti.