Tlawng lei vawiinah hawng dawn

Sihhmui leh Lengpui inkar Tlawng luia lei dawh ṭhat mek chu zawh thawkhat a ni tawh a, vawiin hian lirthei zawh theiha hawn a ni dawn.

PWD chief engineer (Highway) C Lalrinawma sawi danin, lei an dawh thar chu a kilhnate rûkbo mai mai theih loh turin an châr (welding) vek a, welding hi nimin khan an zo nghal a ni.

C Lalrinawma chuan, lei dawh ṭhat leh tak chu hmanraw hluite hmanga dawh a nih avangin lirthei rit lutuk zawh phal loh a nih tur thu leh, truck thil phurh pawh ton 15 leh a chanve aia rit lo chinin zawh theih tura an tih thu a sawi a, "Motor lian leh sang chi tlan theih lohna turin lei sír tawn tawnah thîr kham a ni," a ti.

Lei dawh mek hi Feb­ruary 20 khan Road Transport & Highway Ministry-a additional director KC Verkeyachan leh regional officer Chou­dhury ten an enfiah a ni.