Mimal damdawi-inte bawlhhlawh tihrîral dan Dan zâwm tha leh zâwm tha lo an awm (Vanglaini Chhuichianna)

Damdawi-in thli leh bawlhhlawhte theh­thanga tihrîral chungchangah dan zawm tur a awm a; chu dan chu Aizawl khawpui chhunga mimal damdawi-in ṭhenkhatin ṭha taka an zâwm laiin, zâwm ṭha lo tak tak an awm bawk. Private hospital-te'n bawhhlawh leh thlï an thehthang dante kan thlirho ang a; hengte hi Mizoram State Pollution Control Board (MSPCB) report dan a ni.

Dan zawm tur chu

Damdawi-in bawlhhlawh leh thlìte'n natna hrik hlauhawm tak tak an pai theih avangin mihring hriselna atan a hlauhawm a, Bio-Medical Wastes (Management & Handling) Rules 1998-in a sawi angin, uluk tak a thehthang tur a ni.

Bio- Medical Wastes (Management & Handling) Rules ang chuan, damdawiin bawlhhlawh reng reng chu chi hrang 10-ah ṭhen a ni. Mihring taksa them, taksa zai bun, bâwk zai chhuah te, laboratory-a endik tura pek zawng zawngte (Microbilogy & Biotechnology waste), taksa aṭanga tuiril chhuak chi - thisen, zun, ek leh thil dang leh a tuamna (lapua, soiled plaster cast, bedding, etc.)-te chu polythene eng (yellow)-a tuam tur a ni a. A bika duan hâl ralna (incineration) hmunah hâl ral emaw, lei thûk taka phûm tur a ni.

Mihring taksa khawihna hmanrua, natna inkai chhawn theihna rubber leh plastic hmanrua fûnkhawmna te, thisen, zun leh khâk dahna bâwm leh ip ang chi te, thisen chaw pekna báwm leh hrui te, zun siak chhuahna hrui te, chaw pekna hruite chu rawng sen (red)-a tuam tur a ni a; damdawi (chemical) hmanga sawngbawl vek emaw, chhum hlum vek tur a ni.

Thil zum leh hriam ang chi - hriau, pin, bakcheh, darthlalang, chaicheh leh glass ang chite chu hman nawn theih loha tihchhiat vek tur a ni a; damdawi (chemical) hmanga sawngbawl vek hnuah polythene pawl (blue) emaw a var (white) emawa tuam tur a ni.

Damdawi hluihlâwn tawh te, damdawi thi te, damdawi kehte leh damdawi-in aṭang bawlhhlawh hâl ral (incinerate) tawh te, chemical thil reng reng chu polythene dum (black)-a tuam tur a ni a; mi náwlpui tlawhpawh theih loh a paih tur a ni. A hlauh­awm dan azirin fimkhur taka dah hran a, sawngbawl hmasak ngai chite sawngbawl a, felfai taka thehthang tur a ni.

Thuneitu MSPCB

Damdawi-in bawhhlawh thehthang chungchanga dan kenkawh kawngah MSPCB chu thuneitu an ni a; damdawi-in hrang hrang, nursing home, veterinary institution leh pathological laboratory-te bawlhhlawh sawngbawl dan enfiahtu tur an ni. Damdawi-inte'n dan an zawm loh chuan Supreme Court Monitoring Committee-in a kawhhmuh angin, hrem theih an ni.

Damdawi-in leh pathological laboratory reng rengin MSPCB-ah phalna an la vek tur a ni a, Bio- Medical Waste (Management & Handling) Rules chu a kip a kawiin an zâwm vek tur a ni.

MSPCB hotute chuan, damdawi-in leh pathological laboratory-te'n MSPCB pawmpuina (valid authorisation) an neih loh chuan tihtawp theih a nih thu an sawi a, chutih rualin, titawp nghal loin, kum khat hun pek a, chumi chhunga dan anga an kal chuan pawm theih an nih thu leh, tun dinhmunah chuan valid authorisation nei lote pawh an la hrethiam zel rih niin an sawi.

MSPCB enfiahna report:

Synod Hospital, Durtlang:

Mizorama damdawi-in upa ber pawl a ni a, khum 300 a awm. MSPCB-in ṭum ruk an endik tawh a, BMW Rules an hria a, inkaihhruaina dan an zawm ṭha hle bawk niin MSPCB chuan an chhinchhiah. Bawlhhlawh an tihral dan ziakin an chhinchhiah vek a, MSPCB pawmpuina (authorisation) an nei.

Synod Hospital hian bawlhhlawh chi hrang hrangte felfai takin an thliar hrang a, bawlhhlawhte chu danin a phût angin an tihral hmain an tichhe vek ṭhin. Mihring tana pawi lo turin bâwlhlo (chemical) nen an sâwngbawl vek (mutilation & disinfection) a, an chhûm thih (autoclave) vek bakah, chinai hmangin an chiah vek bawk.

Thil hriam leh zum lam chi chu khur (sharp pit)-ah an paih ṭhin a, a dang chu thûk takah an phûm bo ṭhin. Thil tuiril (liquid waste)-te chu sâwngbawl loin luikawrah an paih ṭhin. Bawlhlawh tihral dan endiktu Infection Control Committee an din a, laboratory changtlung tak an nei bawk.

Adventist Hospital, Seventh-day Tlang:

Anni hian khum 45 an nei a, MSPCB-in ṭum ruk an endik tawh. Damdawi-in bawlhhlawh paih dan tur a duante an zawm ṭhat loh avangin MSPCB chuan pawmpuina (authorisation) an pe lo.

Adventist Hospital hian an bawlhhlawhte chu felfai takin an thliar hrang lo a, a tihral danah BMW Rules an zâwm lo. Bawlhhlawh hrang hrangte chu an tichhe mai a, an hung chhung hmun âwl laiah bâwmah an hâl ral mai ṭhin a; chu chu BMW Rules kalh a ni. Bawhhlawhte chu an hâl ral hmain an sawngbawl hmasa lo a; thil tuiril lam chi chu khur an laih khuarah an luan luhtir ṭhin. Bawlhhlawh paih ral dan chhinchhiahna an nei lo bawk.

Aizawl Hospital & Research Center, Khatla:

Khum 90 an nei. MSPCB-in ṭum nga an endik tawh a, mahse an endik hun lai hi Mission Venga an awm lai vek a ni. MSPCB aṭangin pawmpuina (authorisation) an nei lo a, BMW Rules an hre chiang lo. Laboratory an kalpui ṭawk ṭawk a, BMW Rules lam khawihtu an siam lo a, dan an zâwm chhe hle, tiin MSPCB chuan an chhinchhuah.

Aizawl Hospital hian bawlhhlawh chi hrang hrangte felfai takin an thliar hrang lo. Bawlhhlawhte chu an tihrîral hmain an tichhe vek a, mihring tana pawi lo turin bâwlhlo (chemical) nen an sawngbawl a, an chhûm thi (autoclave) vek bawk a; chumi hnuah an phûm bo ṭhin. Bawlhhlawh tuiril ang chi chu sawngbawl lohin luikawrah an paih tawp a; bawlhhlawh paih dan chhinchhiahna an nei lo.

Alpha Hospital, Kulikawn:

Khum 45 an nei a, an dinna a la rei lo a, MSPCB-in ṭum hnih an endik tawh. Bawlhhlawh tihral dan mumal takin an chhin­chhiah lo a; MSPCB aṭangin 'authorisation' an hmu a, March 24, 2015 thleng a nung ang. MSPCB chuan pawmpuina pe mek mah se, BMW Rules an zawm ṭhalo hle, tiin an chhinchhiah thung.

Alpha Hospital hian an damdawi-in bawlhhlawh chi hrang hrangte chu an thliarhrang lo a, an tihral hmain bâwlhlo (chemical)-a an sawngbawl loh bakah, an chhûm hlum ngai lo a, hmun ruam laiah an thehthang mai ṭhin. Inzainaa thisen chhuak, nau neihnaa thil tuirîl chhuak ang chite pawh sawngbawl (disinfect) loin luikawrah an luan raltir mai ṭhin a ni.

Bethesda Hospital, Bawngkawn:

Khum 30 an nei a, MSPCB-in ṭum nga an endik tawh. MSPCB chuan BMW Rules khawihtu an siam lo a, dan an zâwm ṭha lo hle tiin an chhinchhiah. MSPCB pawmpuina an neilo a, BMW Rules an hre chiang lo.

Bethesda Hospital hian an bawlhhlawhte chu felfai takin an thliar hrang lo a, bawlhhlawh tihral hmaa sawngbawl danah BMW Rules an zâwm lo. Bawlhhlawhte chu AMC bawlhhlawh paihnaah an paih mai a; bawlhhlawh tuirîlte chu sâwngbawl lohin kawrah an paih ṭhin. Bawlhhlawh an tihral dan ziakin an chhinchhiah fel lo a; laboratory erawh an kalpui ṭâwk ṭâwk a ni.

BN Hospital & Research Centre,

Kulikawn:

Anni hi a tir lamah chuan nu nau paite enkawlna leh nau neihna hmun bika siam a ni a, tunah erawh chuan departmnent dangte pawh an nei tawh. MSPCB-in ṭum nga an endik tawh a; MSPCB pawmpuina an nei a, BMW Rules pawh an hria a, dan an zâwm ṭha hle tiin MSPCB chuan an chhinchhiah.

BN Hospital hian bawlhhlawh chi hrang hrangte felfai takin an thliar hrang vek a; danin a phût angin, an tihral hmain an tichhe vek a, mihring tana pawilo turin bâwlhlo nen an sawngbawl vek bakah an chhûm thi vek ṭhin. Thil hriam leh zum lam chi chu khurah an paih a, soiled waste-te chu bawlhhlawh paihna hmunah an paih. Bawlhhlawh tuiril chi chu zémah an dah lut vek a, bleaching powder-in zan khat an chiah hnuah kawrah an paih ṭhin. Bawlhhlawh an tihral dan hi ziakin an chhin­chhiah vek a ni.

Grace Nursing Home, Zarkawt:

MSPCB-in ṭum nga an endik tawh a; bawlhhlawh tihral hmaa sâwngbawl dan­ah BMW Rules an zâwm lo a, MSPCB pawmpuina an nei lo. BMW Rules khawihtu an siam lo a, dan an zâwm ṭha lo hle tia chhinchhiah an ni.

Grace Nursing Home hian an bawlhhlawhte chu felfai takin an thliar hrang lo a; bawlhhlawhte chu bawlhlawh paihnaah an paih a, a chángin an phúm ṭhin. Bawlhhlawh tuirîlte chu bleaching powder-a an sâwngbawl hnuah kawrah an paih mai ṭhin. Bawlhhlawh an tihrîral dan ziakin an chhin­chhiah lo a, BMW Rules an hre chiang lo a; laboratory erawh an kalpui hram hram a ni.

Greenwood Hospital, Bawngkawn:

Khum 80 an nei a, MSPCB-in ṭum ruk an endik tawh. MSPCB pawmpuina nei mah se, BMW Rules an hre chiang lo. Laboratory an kalpui ṭawk ṭawk a, BMW Rules lam khawihtu an ruat lo a, dan an zâwm ṭha pangngai tia chhinchhiah an ni.

Greenwood Hospital hian bawlhhlawh chi hrang hrangte felfai takin an thliar hrang lo a, mahse bawlhhlawhte chu an tihral hmain an tichhe vek ṭhin. Mihring tana pawi lo turin bâwlhlo nen an sawngbawl vek a, an chhum thi vek mai ni loin, chinaiin an chiah vek bawk. Chumi hnuah thil hriam leh zumho chu khurah an paih a, a dang chu leiah an phûm ṭhin. Thil tuirîl lam chi chu sâwngbawl loin kawrah an paih mai ṭhin a; bawlhhlawh an tihral dan ziakin an chhinchhiah lo.

Nazareth Hospital,

Ramhlun & Chaltlang:

Khum 40 an nei a, MSPCB-in ṭum nga an endik tawh. MSPCB chuan a pawmpui a; BMW Rules an hria a, inkaihhruaina dan an zawm ṭha pangngai tiin an chhinchhiah.

Nazareth Hospital hian an bawlhhlawhte chu felfai takin an thliar hrang lo a; mahse danin a phût angin an tihral hmain an tichhe vek a, bâwlhlo nen an sawngbawl vek bawk. Bawlhhlawh tuirîlte chu sawngbawl loin luikawrah an paih ṭhin a; bawlhhlawh an tihrîral dan ziakin an chhinchhiah lo.

New Life Hospital, Chanmari:

Khum 40 an nei a, MSPCB-in ṭum ruk an endik tawh. Bawlhhlawh an tihrîral dan ziakin chhinchhiah fel lo mah se, MSPCB pawmpuina an nei. Laboratory an kalpui hram hram a; BMW Rules an hria a, inkaihhruaina dan an zawm ṭha pangngai tiin chhinchhiah an ni.

New Life Hospital hian bawlhhlawh chi hrang hrangte felfai takin an thliar hrang a; danin a phût angin an tihrîral hmain an tichhe vek a, bâwlhlo nen an sâwngbawl bakah an chhûm thi a, chinai hmangin an chiah bawk. Chumi hnuah bawlhlawh paihnaah an paih a; thil hriam lam chi chu an phûm a, bawlhhlawh tuirîlte chu sawngbawl loin kawrah an paih mai ṭhin.

Vaivenga Hospital & Research Centre, Dawrpui:

Anni hian khum 17 an nei a, MSPCB-in ṭum ruk an endik tawh. Bawlhhlawh an tihral dan hi ziakin an chhinchhiah vek a, MSPCB aṭangin pawmpuina pek an ni a; laboratory an nei lo. Dan an zâwm ṭha pangngai tiin MSPCB chuan remark an pe.

Vaivenga Hospital hian bawlhhlawh chi hrang hrangte felfai takin an thliar hrang a; solid waste (IV set, glove, syringe, catheter) te, thil hriam lam chi te, soiled wastes (bandage, cotton, wool, etc.)-te an ṭhen hrang vek a ni.

Bawlhhlawhte chu Bio-Medical Waste (Management & Handling) Rules-in a phût angin an tihral hmain an tichhe vek a, mihring tana pawi lo turin bâwlhlo nen an sawngbawl vek (mutilation & disinfection) a, chumi hnuah Falkland Venga khur (sharp pit) an siamah an paih ṭhin niin an sawi. Soiled wastes ang chiho chu bawlhhlawh paihna hmunah an paih a; thil tuirîl lam chi - inzaina thisen leh tuiril chhuakte chu zémah an dah a, bleaching powder hmanga an sawngbawl hnuah luikawrah an paih ṭhin.