2015-16 atangin sikul zawng zawng Zing dar 8:00-a tan vek tur tura tih a ni
School Education department hotute chuan, Mizoram sorkara Council of Ministers meeting-in academic session thar aṭanga sikul kai hun darkar khata sawn hma tura thutlukna an siam chu Mizorama sikul zawng zawng, private school-te pawh telin, an zâwm vek tur a nih thu an sawi.
Vanglaini palai zawhna chhangin, School Education department hotute chuan, "Sorkar sikul leh sorkar aṭanga ṭanpuina dawng sikulte chu sorkar sikul ni sa an ni a, an zawm nghal mai tura ngaih a ni a. Private sikulte pawhin Right to Education Act Section 18 angin an zâwm vek tur a ni," an ti.
School Education department hotute chuan, sorkarin a pawm sikulte chuan sorkar thu an zâwm tur a nih thu sawiin, "RTE Act Section 18 bawhchhiate chuan cheng nuai khat thleng an chawi thei a ni," an ti a; chumi hnua dan bawhchhiat vanga hrem ngaia an awm leh chuan ni khatah Rs. 10,000 zel chawi theih a nih thu an sawi.
Department hotute chuan "Sorkarin zirlai leh ram hmasawnna atan ruahmanna a siamte hi mipuiin an zâwm turah kan ngai a, tunah chuan zirlai exam dawn a ni a, result ṭha tak nei turin theihtawp chhuah se, an zirlai tibuai thei boruak dang awm lo se tih hi kan duh dan leh mipui hnena kan ngenna a ni, " an ti.
Sorkarin sikul ṭan hma tura thutlukna a siam hma hian Aizawla sikul ṭhenkhat chuan sikul kai hun an lo sawn hma tawh.
Saviour School, Khatla chuan zing dar 8-ah ṭanin, tlai dar 2-ah an bâng a; an principal C Lalmuankima chuan, sikul kai hun tihhma chu subject lak azirin a ṭhain a ṭha lo niin a sawi a; science subject late tan sikul ṭan hun tihhma chu banah practical tihna hun an neih tam phah avangin a ṭhat lehzual thu a sawi bawk.
February 18, 2015-a Cabinet meeting chuan sikul kai hun sawn hma rawtna a pawm a, academic session 2015-16 aṭanga hman ṭan tur a ni.
Rawtna ang chuan, primary school-te sikul kai hun chu zing dar 8 aṭanga chawhnu dar 1 a ni ang a, middle school-te chu zing dar 8 aṭanga chawhnu dar 2 a ni ang a, high school leh higher secondary school-te chu zing dar 8 aṭanga tlai dar 3 a ni ang.