KHAWTHLIR

Lunglei Times Silver jubilee
Lunglei Times chanchinbu chuan nimin khan an kum 25-na, silver jubilee an lawm a, MJA general headquarters president Vanlalrema Vantawl-in a hmanpui. Lunglei Times silver jubilee lawmna hi DTO conference hall-ah neih a ni a, Lunglei district MJA president K Lalrinpuia leh IPRO Mina Zoliani ten thu an sawi bawk.

Chhiahtlang training
MP Model Village siamna tur scheme, SAGY programme kalpui mekah SIRD buatsaihin nimin khan Rajya Sabha MP Ronald Sapa Tlau-in model village atana a thlan, Chhiahtlang khaw hruaitute tan an khaw community hall-ah ni nga awh tur training buatsaih ṭan a ni.

Lawmthu sawi
Mizo Hmeichhe Ṭangrual chuan thuchhuah siamin, an enkawl Motherless Babies' Home, Khatla-a an naupangte thilpek pea tlawhtute zawng zawng hnenah lawmthu an sawi.

Nurse result
MPSC chuan nimin khan Health department hnuaiah staff nurse atana interview result a ti chhuak a, mi 25 an tling.

Zenghri beihpui
Nimin khan Mizoram pumah zeng hri venna damdawi pek beihpui thlak a ni a, naupang kum 5 hnuai lamte hnenah pek a ni. Pulse polio vaccine hi Health Sub-Centre hrang hrangah leh a pekna tur hmun ruat (booth)-ahte pek a ni a, Mizorama naupang kum 5 hnuai lam 1,30,000 vel pek tum a ni.

RNTCP zirho
Health Services department chuan, nimin khan Health directorate conference hall-ah Mizoram Film Development Society-te pualin Revised National TB Control Programme zirhona an buatsaih.

Jubilee lawm
Aizawla Chanmari Presbyterian Kohhran chuan an kum kum 60 tlin, diamond jubilee an lawm mekah, nimin khan a lawmna pui ber an hmang a, khawtlang huapin ruai an ṭheh.