Vantlang hmunah chhiah khawn mek

Land Revenue & Settlement department chuan chhiah lakna dân thar, The Mizoram (Land Revenue) Act 2013 (Act of No 5 of 2013) tlawhchhanin Aizawl district chhunga biak-in, community hall, thlanmual, khelmual leh home hrang hrang hnenah February thla chhunga chhiah pe tura hriattirna lehkha an thawn chhuak mek.

Revenue department hotute chuan, mipui hmunhma hrang hrang aṭanga chhiah ṭhìnna an thawn chhan sawiin, "Kumina an pek loh­na hi 20%-in kum thar chhiah an pek rualin a pung an pek tho a ngai dawn a, hetiang bik hi veng hrang hrangah khawn tel a ni lo a, office-ah pek a ngaih vang a ni," an ti a; veng ṭhen­khat chuan an pe tawh niin an sawi.

LRS department hotute chuan, thlanmual, community hall leh khelmualte chu YMA kuta awm a tam ber a, V/C kuta awm pawh a awm ve nual niin an sawi a; home-te chu an chairman hminga an thawn chhuah mai thu an sawi. Vantlang hmun, a hmaa chhiah chawi ngai lo, dan thar hnuaia chhiah chawi tura tih zat chu 441 a ni.

Hetih lai hian, chhiah lakna dân thar hnuaiah sorkar office hrang hrangte'n chhiah an chawi ve dawn. Sorkar pisate chhiah chàwi tur hi a tam hle dawn a, cheng nuai 60 chawi turte pawh an awma thu dawn a ni.

Revenue department chuan sorkar department ṭhenkhat aṭangin chhiah an chawi dawn vanga sawiselna (complaint) an dawng tawh a, sorkarin a kalpui dan tur an hriat leh hma chuan lak zel rih an tum niin an sawi.

Thutak Nunpuitu Team (TNT) hotute chuan, chhiah an lo pe tawh sa niin an sawi a, mahse chhiah an pekna chu tuna an awmna hmun ni lo, TNT puala miin an pek sangha dil leh huan atana an hmante a ni. A hmaa an chhiah pek zat an hre chiah tawh lo a, tuna an pek tur zat erawh chu Rs. 52,200 a ni.

Ṭawngṭai Bethel Camping Centre, Chawnpui neitute chuan Revenue department aṭangin lehkha an la dawng lo a; home enkawltu Zohminga chuan, BPL quota an dawn ṭhin chu an lak ngai tawh loh thu a sawi. He home hi BPL buhfai chu quintal 31 aṭangin qtl. 60-ah tihsansak an ni a, mahse, an la ngai tawh lo a ni.

Revenue department chuan kum 1990-91 aṭanga chhiah an lak aṭanga nikum thleng khan chhiah an lak tur tling khawm an beisei zat an hmuh phak loh ṭum 14 an nei a, ṭum 10 chu an khûm thung. Kum 2011-12 ah an beisei zat cheng nuai 1,179 chu nuai 71 chuangin an pha lo a; kum 2012-13 khan an beisei zat nuai 517 chu nuai 86 chuangin an pha lo bawk a, hei hi Aizawl Municipal Council-in chhiah an lak tak zawk vang a ni.

Revenue department-in AMC aṭangin chhiah lak hna chu a la let leh tawh a, kum 2013-14 khan hmuh beisei zat nuai 550 chu nuai 36 chuangin an khum a; kum kal mek 2014-15 ah chuan nasa taka chhiah tihpun a nih avangin target chu an khum hneh viau tura ngaih a ni.