National Games-a medal late lawmpui

Nimin khan chief minister bangla-a banquet hall-ah National Games 2015-a Mizoram aiawha tel, medal late lawmna hun hman a ni. CM Lal Thanhawla chuan, Mizoram tana medal late chu a lawmpui thu sawiin, "Mizoramin kan chhuang che u a ni," a ti.

National Games-a medal late lawmna inkhawmah hian Sports minister Zodintluanga chu chairman a ni a, medal latute an tel kim.

Minister Lal Thanzara, parliamentary secretary (Sports) Hmingdailova Khiangte, Sports department leh Mizoram State Sports Council hotu te, Mizoram Olympic Association leh sports association hruaitute pawh an tel.

Chief minister Lal Thanhawla chuan, National Games-a medal latute chu a lawmpui thu a sawi rualin, hlawhtlinna an chante chu inthununna leh thawhhona ṭhat vangte leh thuawihna vang a nih thu a sawi a, "Mizoram aṭanga tel zinga a tam zawk, 60% vel laiin medal an rawn awrh haw thei hi a lawmawm hle a ni," a ti.

Infiamna lama tun hnaia Mizo­ram hmasawnna chu ṭhang chak hle tih sawiin, Lal Thanhawla chuan, "Infiammite zingah tun hma anga zuk leh hmuam leh zua buai an awm tawh lo a, a lawmawm hle a ni," a ti a; National Games lo awm leh tur leh inelna dangah pawh medal tam zawk lak theih a beisei thu sawiin, chutiang tur chuan infiammite leh association hruaitute ṭang turin a chah.

Inkhawmah hian Mizoram Olympic Association secretary general C Laltlanthanga'n Na­tional Games-a medal latute hmel­hriattirna hun a hmang a; Mizoram contingent-te chef-de-mission Lalduhkima Sailo-in National Games-a Mizoram aiawha telte chêt dan a sawi thung.

National Games 2015-ah hian player 45, mipa 31 leh hmeichhia 14 an kal a, player 25 chuan medal an awrh. Team enkawltu manager leh coach 15 leh official dangte nen Mizoram aṭanga kal zawng zawng chu mi 72 an ni. Football-ah player 20, boxing-ah player pathum, taekwondo-ah player pariat, table tennis-ah player panga, schooting-ah player paruk, weightlifting-ah player pakhat an ni.