Sports-ah i infuih zel ang u - Sports Minister

Sports Minister Zodintluanga chuan, Mizoramin sports hmasawnna tura ṭan a laknaah a ṭangkai zawnga infuih a, intiphur tawn turin Mizo mipuite a sawm a, "A insawisel zawng ni loa a infuih zawnga kal hi a ṭha zawk a ni," a ti.

Nimina Chief Minister Ban­quet Hall-a National Games-a medal late lawmna inkhawm kaihruaitu Sports Minis­ter chuan, "Kum 2008-a sorkar thar a pian hnu khan sports infras­tructure-ah nasa takin ṭan kan la a, a rah kan seng mek a ni," a ti a; football khelmual ṭhain result ṭha a hrin chhuah thu a sawi.

Sports minister chuan, "Sports chawisan kan tumnaah hian ṭhenkhat chuan kan ṭhat lohna lam ringawt hi sawi an ching a, kan ṭhatna hi inhmuhsak tawn ila a ṭha. Sports discipline hrang hrang hruaitute pawh mahni infiamna bik ringawt ngaih­tuah loa discipline dangte pawh kan ngaihsak a ṭha a, insawi­sel tawn hian ṭangkaina a nei lo a, dik lohnaah pawh siam ṭha tura a ṭha zawnga sawiho hi insawi­sel ai chuan a ṭangkai a ni," tiin a sawi.

Sorkarin infiamna hmunhma a buatsaihte sawi chhuakin Mizoram State Olympic Asso­ciation-a senior vice president ni bawk chuan, Taekowndo, Judo, Table Tennis leh Boxing-in anmahni puala hall an neih tawh thu a sawi a; Mualpuia sports indoor stadium lian sak mek chu ram pum huap inelna lian tham thlen theihna khawp a nih thu a sawiin, "Badminton court paruk a leng a, shooting atan 25m shooting range dah a ni ang," a ti.

Sports minister chuan Mizo­rama infiamnain hma a sawn theihna tura a thawhpuite chung­ah lawmthu a sawi a, Sports directorate office, MSSC leh sports association hrang hrang hruaitute chungah lawmthu a sawi.