Minister-in Ngengpuia loneitute a tlawh

Minister of state C Ngun­lianchunga chuan nimin zing khan Ngeng­pui khuaa Horti­cul­ture department ṭanpui­naa thlasik thlai chíngtute huan a tlawh a, hma an sawn zel theihna atana an mamawhte a enfiah.

C Ngunlianchunga chuan, Ngengpui lui kama thlasik thlai chíng ṭhintu, Ngengpui khua leh a ṭhenawm khuate thawh­rimna avangin Lawng­tlai district-in ṭhál laiin chawhmeh tam tak an neih theih phah ṭhin tih a sawi a, "A chang chuan district danga thawn chhuah ngai khawpin an thar ṭhin. Hei vang hian state dang thawh chhuah sa kan châwk luh ṭhinte chu thla eng emaw chen a lo chhâwk a, a lawmawm hle a ni," a ti.

Ram hmasawnna atana kawng hnai ber chu kan mamawh, kei­mah­ni ngeiin kan thar­chhuah a ni tih sawiin C Ngun­lianchunga chuan, "Vawiina lonei­tute thawh­rimna hi fak tlak a ni," a ti. Thlai huan siam­tute hian an duh­thusama tui an hmuh ṭhat loh thu leh leilehna hmanrawn ṭha an mamawh thu minister hi an hrilh a ni.

Minister ṭawiawmtu Lawngtlai DHO L Lal­hming­mawia Pachuau chuan, Horticulture Mis­sion for North East and Himalayan Region (HMNEH) leh Mission for Integrated Development of Horticulture (MIDH) hnuaiah Ngengpui khuaa loneitute hi ṭanpuina kawng hrang hranga an siamsak thu a sawi.

Sorkar thuchhuah tarlan danin, Ngengpui lui kamah hian chhungkaw 30 velin thlasik thlai an chîng a, chhungkaw pakhatin cheng nuai 1 aṭang nuai 1.5 inkar an la lut ṭhin. Kum 2013-14 khan an thlai thar aṭangin cheng nuai 15 vel an la lut a ni.