Media-te thu dik lo chhuahah puh

Kolasib District Vigilance and Monitoring Committee-a sorkar official ni lo, NGO aiawha telte chuan thu­chhuah siamin, Kolasib District Vigilance and Monitoring Committee meeting-a Kolasib CMO Dr H Lalchungnunga thu sawi dan chu a dik tawk loa chhuahah media-te an puh.

Kolasib District Vigilance and Monitoring Committee meeting-a tel ve, sorkar official ni lo member-te - MHIP aiawh Laltluangi, YMA aiawh C Lian­kunga leh prominent citizen HF Sena te chuan nimin khan thuchhuah an siam a; meeting chung­changah media-te'n thu dik lo an puangzar niin an tarlang.

Meeting-a tel ve mi pathumte chuan, Kolasib CMO thu sawi media-in an report danah thil hriat sual a awm nia an hriat thu sawiin, pawi an tih thu an sawi a ni.

Mi pathumte tarlan danin, Kolasib DVMC meeting-ah hian Kolasib CMO chuan April-December 2014 chhunga nau chunga thi nu pathumte chu thisen sawngbawlna man neih loh vanga thi an nih thu a sawi lo a; blood transfusion-a harsatna sawihonaah, nu nau nei thisen mamawh a awm thu leh a pasalin thisen sawngbawlna man tur ngaihtuaha a buai thu a sawi a, ni dangah harsatna a awm tawh loh nan MP CL Ruala chu ngaihtuahsak turin a ngen a ni.

Hetih lai hian, Kolasib MJA chuan, Laltluangi, C Liankunga leh HF Sena ten Kolasib CMO thlavâng hauhna Press Statement an siamah Kolasib media-te thu dik lo tichhuak anga an sawi chu ṭha lo an tih thu an tarlang a; February 14, 2015 chhunah CMO Dr Lalchungnunga'n MJA hruaitute lêngah sâwmin ngaihdam a dil a, 'Ka sawi loh tawp tur ka lo sawi palh a ni,' tiin a sawi niin an sawi bawk.