Mamit DC-in Airtel hrui phûmtute a kâwm

Mamit DC Vanlal­nghaihsaka chuan, Mamit district chhunga Airtel 4G hrui phûm hna thawk mektute nimin khan a pisaah a kâwm a, an hna dante leh an thawh tawh chinte a sawipui.

Vanlalngaihsaka chuan, Mamit khuain Mizoram Presbyterian Hmeichhe Khawmpui Lian a thlen dawn thu sawiin, kawng laitute chu kawng laih a nih avanga mikhual thleng turte tana harsatna awm theite inveng lâwk turin a hrilh a; inkhawmpui ṭan hma ngeiin kawng laih vanga lirthei inpelh thei lohna laite chu siamṭha turin a ngen.

Tunah hian Lengpui-Mamit inkar kawngah Airtel-in 4G hrui phûmna turin kawngpui sirah an lai mek a; kawng a tihzìm sawt lirthei kal vel tan harsatna neuh neuh a siam a, Dampui leh Mamit inkar hmun ṭhenkhatah chuan lirthei an insûlpêl thei lo a ni.