March 2-ah zu zuar ṭan thei dawn lo

Mizoram sorkar chuan March 2 aṭanga zu zawrh an tum chu harsatna eng emaw a awm avangin an sawn hla leh deuh dawn a, March 2015 chhunga zawrh ṭan hman ngei tura ṭan lak mek a ni.

Thu dawn danin March 2, 2015 aṭanga zu zawrh ṭan theih loh chhan chu zu ûma bel tur hologram peihfel har vang a ni. Hologram hi company lam buaipui tur niin, vawiin hian a lo thlen beisei a ni a, vawiinah lo thleng mah se, March 2-ah chuan inpeihfel hman an beisei lo a ni.

Zu zawrh hun turah hian thutlukna siam a la ni lo a, mahse, sorkar chuan March thla chhung ngeia zawrh turin ruahmanna a siam. Vanglaini palai zawhna chhangin Excise & Narcotics departmnent hotute chuan, zu zuar turin anni lam chu an inpeih vek tawh tih an sawi.

Tarlan tawh angin, Mizoram Liquor (Prohibition and Control) Act chu January 15, 2015-ah hman ṭan a ni a, hman ṭan hnua zu kaihhnawiha mante chu MLPC Act hnuaia hrem an ni.