STA-in taxi chuan man thar a siam Rate zâwm lo hriattir turin an ngen

State Transport Authority (STA) chuan March 1, 2015-a hman ṭan turin taxi chuan man a bituk thar. Taxi fare thar hi tuna hman mek aiin a sang zawk a ni.

STA hotute chuan, sorkarin taxi fare a bituk zâwm duh lo taxi driver an awm chuan, an hnenah emaw, police/enforcement staff hnai berah emaw, consumer union-ah emaw hriattir turin an ngen.

STA hotute chuan nimin khan taxi fare tihsan chungchang chu I&PR conference hall-ah an sawifiah a; Transport secretary Hrangtawna chuan, "Taxi chuan man hi kan buaipuina a rei tawh. Taxi permit hi mipuite tan liau liaua sorkarin a pek a ni. Mizoramah chuan mipuite'n veivahna atana an hman tam ber a ni. Taxi neitute hian an mawhphurhna an hre lo emaw tih cháng awm ṭhin mah se, a pumpuia thlir chuan an service a ṭha kan ti," a ti.

Hrangtawna chuan, Mizoram chu khawpui dang anga zawl a nih loh avangin taxi fare bituk a harsat thu sawiin, "Kawng chho tak tak leh kilkhawr tak tak kal a ngai a, a buaithlak hle," a ti a; taxi fare thar chu Mizoram Consumers Union, Mizoram Taxi Owners Association leh Mizoram Taxi Drivers Asso­ciation rawtna thlir chunga siam a nih thu a sawi.

Taxi chuan man thar hi Aizawla taxi stand-a sorkarin a pawm 45 inkarah km. 1-ah Rs. 40 hisâpa siam a ni a, km. 1 aia a thui chuan km. 1 zelah Rs. 30-in a pung ang. Kilometer laklawh a awm chuan taxi khalhtu leh a hmangtute inremsiamna anga kal tur a ni. Zan dar 9 aṭanga zing dar 4 inkarah chuan taxi fare chu a pangngai aia 25%-a sang tura tih a ni bawk.

STA hotute chuan, sorkarin taxi fare a bituk zâwm duh lo leh kal duh lohna hmun nei an awm chuan STA, MCU, leh police/enforcement hnai berah hriattir turin an ngen a, "Pawisa chawitir leh lung-in tân bakah, an permit cancel thlenga hrem thei an ni. Permit pek an nih dawnin sorkar thu zawm an intiam a ni," an ti.

Petrol man a tlakhniam hle hnuah pawh taxi rate tihsan belh a nih chungchangah STA hotute chuan, "Petrol man hi tlahniam mah se, eng chen nge a hniam dawn hriat a ni lo. Taxi enkawlna leh a part man a to ve reng a ni," an ti a; taxi chu PPP mode ang deuha kal a nih avangin an harsatna tawhte sorkarin a ngaih pawimawh ve a ṭul thu an sawi.