Thlanmual leh biak-in chhiah titawp Kalpui zel dan tur kan sawiho ang - R. Romawia

Land Revenue & Settlement (LRS) secretary Zothankhuma chuan, February 23, 2015 khan notification tichhuakin, thlanmual leh biak-ina chhiah lâk chu tihtawp hrih a nih thu a tarlang.

Hemi chungchanga Vanglaini palai zawhna chhangin Reve­nue minister R Romawia chuan, "Thlanmual leh biak-ina chhiah lak hi tihtawp a nih dawn leh dawn loah thutlukna kan la siam lo a, tuna an chawi ang zat zat chhiah chawi lo a, a hminga chawitir ve chauhte pawh ngaihdan a awm. Engtin kan kalpui zel dan tur kan la sawiho leh dawn a, chumi hma chu thlanmual leh biak-ina chhiah chawi chu tihtawp hrih a ni," a ti a; thlanmual leh biak-in chhiah lo pe tawh an awm chuan pek let leh an nih tur thu a sawi.

R Romawia sawi danin, kum 1995-a LRS director-in order a chhuahah, chhiah châwi lo tur eng emaw zat an awm a, mahse kum 2013-a order chhuak lehah chuan chhiah châwi lo tura tihna a awm tawh lo thung. Hei vang hian sorkar hmun, vantlang hmun, biak-in leh thlan­mualahte chhiah lak a ni.

Land lease leh LSC-a chhiah inanga lak chu thil tih chi a nih loh thu sawiin, LRS Minister chuan, "Land lease chu ram inhawhtir ang a ni a, LSC chu neitu nihna a ni. Chuvangin, chhiah an chawi a inang thei lo," a ti.

R Romawia chuan, sorkar leh vantlang hmun land lease-a awmte LSC nena ang khata chhiah chawitir an nih dan pawh ennawn a nih dawn thu a sawi a, tun dinhmunah chuan thlanmual leh biak-ina chhiah lâk chu an tihtawp hrih phawt thu Vanglaini a hrilh.