KHAWTHLIR

CYMA thuchhuak
Central YMA chuan thuchhuah siamin, "AMC-in AMC Licensing Regulation 2012 hnuaia Aizawla sumdawng leh dawrkaite inziak lut tura a tharthawh leh hi hriatthiam harsa kan ti," an ti. Licensing Regulation-a licence diltute aṭanga Mizo tribal certificate, Mizoram permanent residential certificate leh Mizoram voter ID thil tel phut a nih loh chuan hman loh an duh thu an tarlang.

Rangvamual kawng
Aizawl additional DC chuan thupek chhuahin, Rangvamual leimin paih hna thawh mek chu a hma thei ang bera zawh a nih theihna atan, hna thawh hun chhung pawhsei ṭula an hriat thu a tarlang a, nimin aṭang khan zing dar 6 aṭanga zan dar 10 thleng hna thawh a nih tawh thu a tarlang bawk.

Pack house hawng
Parliamentary secretary (Horticulture) K Lalrinthanga chuan, nimin khan RKVY scheme hnuaia Sihphir khuaa loneitute tana pack house siam a hawng.

Rs. 20,000 pe
Home Mission School, Zarkawt chuan social community service hnuaia an hmalakna chi khat atan nimin khan Mamit Joint V/C hnenah an khua an vawn fai avangin Rs. 20,000 an pe. Pawisa hi Mamit Joint V/C aiawhin vice chairman Lalthanzuala'n a dawng a ni.

CM relief fund
Mizoram Truck Owners' Association chuan, Chief Minister Relief Fund-ah tun hnai khan Rs 10,000 an chhung lut.

CADC V/C thlan
Chakma Autonomous District Council (CADC) huam chhunga village council 81-ah vawiin hian inthlan a ni dawn. CADC-a V/C inthlanah hian zing
dar 7 aṭanga tlai dar 4 thleng vote thlak a ni ang a, vote thlak zawh velah vote chhiar nghal a ni ang.