Kum 2016-ah Tuirial HEP zawh tum

25th February, 2015

Kawlphetha megawatt 60 pe chhuak thei tur, Tuirial Hydro Electric Power (HEP) project siam hna thawk mektu NEEPCO hotute chuan, Tuirial HEP chu kum 2016-ah zawh hman an beisei thu an sawi.

Tuirial HEP hi Congress party ṭhalaite'n February 23, 2015 khan an tlawh a, MPYCC president Vanlalawmpuii Chawngthu, MLA leh general secretary Chalrosanga Ralte, MLA-ten an ho a, thuthar thehdarhtu ṭhenkhatin an ṭawiawm.

Tuirial HEP siam hna thawh mek chu Congress party ṭhalaite chuan an fang kual a, NEEPCO deputy general manager Sanjiv Sarkar-a'n an hna thawh dante a hrilhfiah.

NEEPCO hotute sawi danin, Tuiriala tui luang lai lâk pênna tur leiverh, metre 787-a thui chu an zo tawh a, tui chu lei verhah luantir a ni tawh. Tui khuaptu tur tak chu 69.50% an zo tawh a; tui khuahna tur lei chhûn pâwn chu lui chhuat aṭanga metre 92-a sang tur niin, metre 70 vel thleng an chhung tawh a ni.

Lui tui khuahna tur siam hna hi kuminah zawh vek an tum a, cement concrete hmang loa lei an hman chhan chu lirnghing lakah a him theih nan a nih thu leh, a tìr aṭangin lei chhûn pâwn hmanga khuah tura duan a nih thu an sawi.

Tui tam zual chánga tui paihna tur 'spill way' (overflow) chu 90% vel an zo tawh a, power house siam mek chu 30% vel an zo tawh. Tuikhuahah tui a tlin hunah chuan Tuirial leh Tuirini infinna, Khawruhlian bul thleng, km. 85 vela thui tuiin a chîm tura ngaih a ni.

Tuirial HEP-ah hian power house-ah turbine pahnih, megawatt 30 ve ve pe chhuak thei bun tur a ni a, a vaiin megawatt 60 siam chhuak thei tura ngaih a ni.

Zawhna chhangin NEEPCO hotute chuan, hna thawktute (labour) chu Mizoram páwn aṭanga chah luh deuh vek an nih thu an sawi a, "A chhehvela mite'n lo neih leh hna dang an thawh duh zawk vang a ni," an ti. An harsatna tawh lian ber chu lung ṭha, rawra atan hman tur an duh ang a vâng lutuk chu a nih tih an sawi.

Tuirial HEP-in kawlphetha a siam chhuah megawatt 60 aṭangin 12% chu Mizoramin a thlawnin a chang dawn a, chu chu megawatt 7.5 a ni. A dang zawng chu NEEPCO hnen aṭangin lei a ngai dawn a, a lei bâng a awm chuan state dangin an lei ve thei dawn a ni.