CYLA-in total bandh an huaihawt Diltlang khawtlangin bandh an dem

Central Young Lai Association (CYLA) bultumin nimin zing dar 5 aṭang khan Lai Autonomous District Council (LADC) chhungah tiamchin awm loin total bandh buatsaih a ni a, he thuziah lai thleng hian tihtawp a ni lo.

Thu dawn danin, total bandh neih a nih avang hian office, zirna in leh dawr inhawng a awm lo a, Lawngtlai DC erawh chu sorkar thu ngaihchan a ngaih avangin office a kai thung. Police-te'n magistrate kaihhruaihna hnuaiah venhim hna an thawk a, buaina liantham thleng hriat a ni lo. LADC huam chhunga kal tum leh paltlang ngaite erawh an kaltlang thei lo a ni.

CYLA hruaitute chuan, sor­kar aṭangin thu lawmawm an la dawn loh avangin total bandh chu zanah pawh chhunzawm zel an tum thu Vanglaini an hrilh a, "Sorkar aṭanga thu lawmawm kan hmuh hma chuan bandh hi chhunzawm kan tum," an ti.

CADC hnuaia village council inthlan neih tura duty tur Lawngtlai aṭanga chhuak turte chu an chhuak vek tawha an hriat thu sawiin, CYLA hruaitute chuan, nimin leh vawiina chhuah ngai an awm pawhin bandh buatsaih a nih tawh avangin dan an nih tur thu an sawi.

Tarlan tawh angin, CYLA hian Lawngtlaia Power & Electricity sub-division chu division-a hlankai te, Lawngtlai leh Lunglei inkar kawng siamṭhat leh, World Bank sum hmanga kawng laih tur chu Samang tlangdung pal­tlangtir lohte an phût a ni.

Hetih lai hian, Diltlang South V/C leh YLA branch-te chuan thuchhuah siamin, sorkarin World Bank sum hmanga Samang tlangdunga kawngpui sial a tum dodal a ni leh Tui thlang (Lawngtlai West) mipuite rapbet zawnga CYLA-in total bandh a huaihawt chu ná an tih thu leh an dem thu an tarlang.

Diltlang South khawtlang chuan, sorkar hmalakna tiṭhuanawp zawnga hma la lo tur leh sorkar hmalakna a hlawhtlin theih nana theihtawp chhuahpui zawk turin CYLA an ngen tih an sawi bawk.