Rohluna'n oil leh gas zawnna hmun a tlawh

Geology & Mineral Resources (GMR) minister H Rohluna chuan, nimin khan ONGC-in Zanlawn rama hydrocarbon laih chhuah tuma hna thawhna hmun leh Meiduma gas an hmuchhuah tawhnate a tlawh a, an hnathawh dan a en.

H Rohluna chuan, Mizoram chhunga leilung hausakna hai chhuah rûnpui thawh mekah sorkar a hmanhmawh rualin a fimkhur hle tih sawiin, "Ram leilung fate’n an chanvo tur an chan miah lohna turin sorkarin theihpatawp a chhuah a ni," a ti a; ONGC hotute chu an thil zawnah hlawhtlinna an hmu a nih chuan inremna anga ram leilung fate hamṭhatna buatsaih turin a hrilh.

G&MR Minister hian hydrocarbon zawn hna thawhna bul hnaia chengte chu an hma lawkah hamṭhatna tam tak an têl dawn a ni tih hria a, hna thawktute chungah ṭhat chhuah turin a fuih a, ONGC leh Oil India Limited-te hmalakna chu Mizoram tan sum leh paia hmasawnna thlentu tur a ni tih hre turin a chah.

Minister zawhna chhangin ONGC hotute chuan, Mizoram leh Tripura leilungte an in an loh thu sawiin, "Gas emaw, oil emaw hi a state pakhat zawk lei hnuai aṭanga a ṭhenawm state hnuaia awm chu lak pên theih a ni lo," an ti.

ONGC hotute chuan, an khawl lian, Silchar aṭanga Zanlawn hnuh thlen nan Kawnpui leh Zanlawn inkara kawng zím lai hmun pariatah a zauh hna an thawh theih nan Border Road Organisation (BRO) aṭangin phalna an neih tawh thu an sawi.

Zanlawn khaw daia Hydrocarbon Exploratory Well laih hna hi January 2015-ah ṭan a ni a; a hmunhma atan sq.km. 40,000 rua­hman niin, leivûng cubic metre 1,20,000 awm tura chhût a ni. Ruahman ang chuan, lei verh hna chu April 7, 2015-ah ṭan a ni ang.

Minister H Rohluna hi parliamentary secretary (GMR) Joseph Lalhimpuia, KVI Board chairman K Lianzuala leh GMR director Dr H Lallenmawia ten an ṭawiawm a ni.